ESTRADA TIBAR-LIQUIÇA HEIN TAU BASE COURSE

Mega projetu konstrusaun Estrada Tibar to’o Liquiça ne’ebe ezekuta husi empreza internasional San Jose, hein deit atu tau base course.

Reprezentante San Jose, Leandro Bessa Adriano, Tersa (16/6/2015), klarifika ba jornalista sira iha nia servisu fatin, katak, projetu Estrada ne’e besik remata ona no hein deit atu tau base course.

Empreza San Jose hetan kritika maka’as husi komunidade no reprezentante povu nian iha Parlamentu Nasional, tanba servisu tinan ona mas la hatudu nia rezultadu positivu. At liu tan, projetu ne’e hamosu rai rahun mahar hodi falun komunidade sira ne’ebe maka hela besik estrada ibun.

Ba lamentasoens ne’e, Leandro Bessa Adriano hateten, dala ruma mosu rai rahun, maibe empreza tenta nafati resolve hodi prepara kareta tanki tolu tula bee no rega Estrada dala tolu iha loron ida (dader, meudia no lorokraik).

“Problema estrada ne’e luan no naruk, maka rega laliu oras rai-rahun sae lalais fali deit,” hateten Leandro Bessa Adriano.

Estrada diresaun Tibar to’o Liquiça gasta osan US$ 20.516 ne’ebe mak mai husi fundu ADB. Nune’e, iha fiskalizasaun Komisaun E Parlamentu Nasional (PN) ba asuntu Infra-estruturas, Transportes no Komunikasaun relata katak, projetu ne’e ho nia distansia kilometru 21, maibe sira halo deit kilometre 18 no suspenda hela kilomentru 3 tanba atu Governu sei halo Portu Tibar ne’ebe sei loke tan dalan.

Nune’e Iha fiskalizasaun komisaun E nian iha fulan Abril 2015 nian ne’e simu kritika balun husi trabalhador ne’ebe mak serbisu iha mega projeito estrada diresaun Tibar-Liquiça, tanba deit kompanhia ne’e husi Espanhol entaun maioria trabalhador husi sira nian.

Leadro Bessa esklarese tan, sira mak kontrator ba projetu, ne’ebe sira fo fali ba sub kontrator Timor oan sira hamutuk rua nulu (20). Kona ba trabalhador sira dehan maioria husi Estranjeiro ne’e lalos, tanba 20% deit maka trabalhadores estranjierus no 80% trabalhadores lokais.

Ekipamentu sira ne’ebe mak sira uja sempre teste husi konsultan Ministeriu Obras Publiku (MOP) nian kuandu iha kualiadade mak sira uja laiha ba sosa seluk, tanba iha kontratu ne’e klaru tiha kedas ona.

Projetu ne’e hahu iha loron 14 Novembru 2013 no sei remata iha loron 15 Agusto 2015, maibe tanba mudansa kilimatika entaun sira seidauk bele termina tempu, tanba kuandu udan sira labele hala’o serbisu ho diak. mia

Jornal Nacional