MANIFESTASAUN L 7 LA KONTRA LEI

DILI – Ema hotu iha direitu atu halo manifestasaun, tanba nee direitu fundamental sidadaun nian. Importante mak labele hamosu aktu violensia iha manifestasaun nia laran.

Advogadu Privadu Pedro Apariçio neebe fo asistensia ba Cornelio Gama alias L-7 hatete, nia kliente L-7 iha direitu atu halo manifestasaun. Tanba kazu halo manifestasaun nee ema nia dieritu no laiha lei ida mak bandu. Manifestasaun hanesan direitu fundamental sidadaun nian, importante mak iha manifestasaun nia laran labele hamosu violensia. Kuandu mosu problema nee mak kontra lei.

Neebe kuandu parte seguransa la autoriza L-7 atu halo manifestasaun, nee sira mak kontra fali lei direitu fundamental sidadaun nian neebe konstra iha konstituisaun. Liliu polisia laiha poder para foti desizaun hodi dehan labele halo manifestasaun, maibe polisia so halo deit linha koordenasaun katak manifestasaun halo iha neebe, hahu husi neebe no iha sa oras no buat seluk tan kona ba seguransa nian,” dehan Pedro ba jornalista iha TDD, Kuarta (17/06/2015).

Nia hatutan, kazu L-7 atu halo manifestasaun nee la kontra lei maske sei iha hela prosesu aplikasaun TIR nia laran. TIR nee hanesan medidas neebe kman liu husi prosesu Tribunal nian, neebe nia livre atu halo aktividade saida deit. Sentidu husi TIR mak bainhira kliente nee atu muda hela fatin tenke informa ba iha Ministeriu Publiku, para nunee fasil atu halo justifikasaun ba nia.

Iha parte seluk reprezentante povu iha uma fukun Parlamentu Nasional (PN) husi bankada CNRT, deputadu Pedro da Costa hatete, diak liu maun L-7 lalika halo demo, tamba oras nee povu moris iha ambiente paz no harmonia nia laran. Informasaun kompletu iha STL Jornal no STL Web, edisaun Kinta (18/6/2015). Domingas Gomes

Suara Timor Lorosae