KRESIMENTU EKONOMIA TUN 2,6% LA FO IMPAKTU BA POVU

DILI - Kresimentu ekonomia Timor-Leste (TL) tun 2,6%  la fo impaktu ba povu, maibe importante liu mak governu tenki hadia povu nia moris. Diretor organizasaun naun governamental Luta Hamutuk Mericio Akara hatete ba jornalista BT kuarta (10/06) iha Palasio Presidente Aitarak laran katak kresimentu ekonomia ne’e dala ruma sae maka’as maibe dala ruma la dun liga ba povu nia moris lor-loron  tanba governu hasai osan maka’as liu husi fundus  minarai.

“Tanba dala ruma ita distribui ita mos hanoin katak ita konsumi  hotu ona maibe kapasidade de kontrak ne’e mos lao maka’as ona maibe realidade ne’e kresimentu ekonomia tun ne’e la relasaun ho povu nia moris lor-loron nia, hau kolia ne’e kontrariu ituan tanba kresimentu ekonomia ba hau la dun diresaun direita ho komunidade sira maibe hau nia dirasaun direita mak  dezemvolvimentu ekonomia,” dehan diretor ne’e.

Nia dehan, dezemvolvimentu seitor agrikultura  ne’ebé  inportante ba povu sira nia moris kona ba kampu de traballo investor sira mai loke sira nia fabrika ka lae, ida ne’e mak besik liu ba povu nia moris maibe kona ba kresimentu ekonomia ne’e la dun liga ba povu nia moris tanba kresimentu foin lalais ne’e sae maka’as, povu kontinua kiak nafatin.

Alende ida ne’e, nia mos esplika tan katak, osan minarai  nasaun ne’e nia  investe iha orsamentu geral do estadu distribui liu husi infranstutura sira ne’e maibe governu nunka atu hanoin povu nia moris, povu sira ne’e partisipa  ba servisu ka lae, maibe osan sira ne’e hari fabrika ruma povu sira ba servisu iha ne’eba ka lae, sira  kontrola to’o iha ne’eba tanba osan ne’ebe mak uja mai husi fundus minarai deit.

“Tuir lolos ne’e ita tenki kontrola ba osan ne’ebe mak mai husi seitor sira seluk hanesan agrikultura  turismu sira mak fo osan entaun ita senti kontenti tanba produsaun iha rai laran ne’e hasae, tanba kresimentu ekonomia ne’e falsu, ne’e nia siknifika  namlele duni, ninia realidade mak ne’e povu kiak nafatin, ema ida sidauk hetan osan 50 centavus loron ida,” nia esplika. (BT)

Jornal Business - TiNa