OPERASAUN HANITA ALUGA KARETA 20

Atu fasilita diak liu tan transporta forsa Empenhamento Operasaun Konjunta (EOK) iha terenu, maka komando aluga tan kareta iha fatin rental hamutuk unidade 20.

Husi Orsamentu miloens 2 USD ne’ebe akola ba operasaun HANITA ne’e, EOK aluga kareta 20, maibe Vise Xefi Estadu Maior F-FDTL, Brigadeiro Filomeno Paixão, la esplika detalhu kona-ba gastus orsamentu baa luger kareta hirak ne’e.

“Persegisaun kontinua ba Mauk Moruk  to’o nia tun mai rende,” hateten Filomeno Paixão ba Jornalista iha Palacio Presidensial, Kuarta (15/07/2015), hafoin enkontru semanal ho Presidente Republika (PR) Taur Matan Ruak.

Hatan ba preokupasaun Bispo Diocese Baucau no Administrador Apostoloko Diocese Dili, Mgr. Basilio do Nascimento, ne’ebe konsidera operasaun HANITA ne’e hanesan fali projetu ida, Brigadeiro Filomeno Paixão, hateten katak, iha liberdade para ema bele kualia, tanba  ne’e demokrasia.

 Nune’e mos  Filomeno Paixão dehan to  oras ne’e  Komando seidauk simu rezultadu autopsia ba mate isin Luis Ramos Boavida  ne’ebe mak diskonfia tiru husi soldadu F-FDTL nudar membru EOK.

Husi sorin seluk  Ministru  Interior (MI) Longuinhos Monteiro  ho Ministru Defesa (MD) Cirilio Cristovão informa situasaun seguransa ba PR Taur Matan Ruak.

“Hau ho Sr Ministru Defesa hanesan partilha enkontru ho PR Taur  hodi informa situasaun seguransa iha ita nia rai,” informa Longuinhos Monteiro.

Longuinhos Monteiro dehan, informa mos kona-ba  futu imigratoriu ninian  iha Timor Leste I nune’e mos informa  kona-ba estatistika krimi ninian  balun.

“Presidente nia posisaun sempre mantein katak, operasaun sei la hapara, tenki halo nafatin para depois ita  alkansa ita nia objektivu husi rezulusaun  Governu nian para depois Mauk Moruk mai responsabiliza ninia aktu krimi sira ne’e iha Tribunal,” afirma Longuinhos Monteiro.

 Wainhira husu mos kona-ba operasaun  gasta orsamentu hira ona, Longuinhos Monteiro hatan, relatoriu orsamentu sei fo sai depois de reniaun Konselhu Suprior, Kinta ohin (16/07/2015).

Iha Kuarta (15/07) tuku 15:00 loro kraik  oras Timor Leste Presidente Parlamentu Nacional (PN)  Vicente Guteres hasoru PR Taur Matan Ruak  iha Palacio Presidensial Aitarak Laran, maibe depois de enkontru  la kohi responde jornalista. avi

Jornal Nacional