Mediteráneu kontinua halo vítima, ema na'in 2.760 resin mate ona iha tinan ne'e

Halai hosi funu no perseguisaun, halo sira tama iha rede sira tráfiku nian. Hodi buka mehi europeu sira halo viajen perigozu ho ró no kondisaun nebe ladi'ak.

Iha tinan ne'e migrante na'in 2.760 resin mate ona bainhira hakarak atravesa tasi Mediteráneu, liu na'in 500 iha períudu hanesan iha tinan liubá, haktuir hosi Organizasaun Internasionál ba Migrasaun (IOM).

Barak liu halai hosi funu no perseguisaun, halo sira tama iha rede sira tráfiku nian hodi bele hetan kondisaun moris no seguransa nebe di'ak. Tanba ne'e sira hatán hodi halo viajen ida perigozu ho ró no ho kondisaun ladi'ak.

Iha de'it loron haat dahuluk fulan-Setembru nian, ema na'in 58 mate bainhira hakarak to'o iha tasi-ibun europeu nian.

Hosi númeru totál vítima sira nian, na'in 2.630 mate iha viajen nebe hahú hosi tasi-ibun Líbia nian no hosi Tunízia, na'in 150 iha viajen entre Turkia ho Grésia, no na'in 25 iha Strait of Gibraltar.

Hamutuk, iha tinan 2015 to'o ona iha tasi-ibun europeu nian ema na'in 378.343, na'in 256.458 to'o iha Grésia, na'in 119.619 to'o iha Itália, na'in 2.166 iha España no na'in 100 iha Malta.

Entre labarik ki'ik sira nebe mesak no hetan iha tasi-ibun italianu sira - informasaun úniku nebe IOM fó - barak liu hosi Eritreia, tuir síriu no ema somali sira.

Ema millaun resin halai hosi konflitu todan sira iha rejiaun oioin iha Médiu Oriente, liuliu ema síriu ho irakianu sira, aleinde ema afegaun, nebe tenta to'o iha Europa Osidentál. Entrada ida nebe uza liu maka "rota Balkã nian": Migrante sira liuhosi Grésia, Masedónia ho Sérvia, antes tama iha Hungria, nasaun dahuluk hosi Uniaun Euroepu nebe sira tama no hahú hosi ne'e sira hakarak kontinua viajen ba nasaun sira hanesan Alemaña ho Suésia.

Europa hasoru grupu ema barak nebe la pára, Bruxelas hatete ona hanesan krizi aat liu refujiadu sira hahú hosi Funu Mundial Daruak nian.

Komisáriu Aas hosi Nasaun Unidu ba refujiadu, António Guterres, fó ona apelu ba distribuisaun ba pelumenus refujiadu na'in 200.000, hodi defende katak Estadu-membru sira hotu tenki iha obrigasaun hodi partisipa iha programa ne'e.

SAPO TL ho Renascença