Konvida MNC investe iha TL la taka dalan ba timoroan

DÍLI - Segundu Vise, Ministru Obras Publika Trasporte no Komunikasaun (MOPTK), Inacio Freitas Moreira hatete  Lei Komunikasaun Sosial hatete klaru no fo dalan ba media estranjeiru atu tama mai investe iha  Timor-Leste tanba ne’e nudar membru governu iha direitu atu konvida investor ne’ebé deit mak iha interese atu investe iha nasaun foun ne’e.

“MNC group ne’e, labele hanoin dehan media de’it, Ami koalia laos ba media deit, depois ba property nia bele mai halo realistik tanba ema iha osan, depois nia bele mai aluga nia sateliti ne’ebé maka baratu liu. sala ne’e iha ne’ebe? la sala buat ida. hau hanoin, ida ne’e maka ita tenki koalia la bele dehan nia maka manipulan hotu.

Ida ne’e labele,” Inacio hateten ida ne’e ba Business Timor, kinta (10/09)  hodi hatan ba preokupasaun publiku  kona-ba investimentu media internasional liu liu MNC grup ne’eb’e Vise ministru ne’e konvida foin lalais.ne’e. “Ita foin halo aprosimasaun de’it komesa kolia barbarak ona. Ema  iha kapital (Asaun), sala ne’e sai ida, labele hasoru nia ga? laos hanesan ne’e. dehan hadia ne’e hadia saida?  Tinan bailoron hadia husi ne’ebé, hau hakarak husu de’it satelit ne’e aluga hira,” preokupa Inacio. 

Nia hatete laiha sala atu konvida investor internasional ne’ebé iha kapital atu mai halo investimentu iha nasaun foun ne’e. “Hau hakarak afirma de’it katak hau ba hakbesik an ne’e ami foin koalia de’it seidauk hola desizaun, ita foin hakbesik de’it komesa preokupa ona. afinal governu ne’e servisu hanesan ne’e, labele hanesan ne’e, ne’e la di’ak,”dehan nia. 

Parte seluk Sekretariu Estadu Komunikasaun Sosial (SEKOMS), Nélio Isaac Sarmento  hateten, inisiativa atu lori investor estranzeiru mai investe iha area komunikasaun sosisal ne’e la sala maibe tenke haree uluk lai ba kondisaun nasaun foun ne’e nian. “Tuir hau nia opiniaun la iha buat ida sala. Maibe haree ba kondisioens Timor-Leste nian, Hau hanoin di’ak liu dezenvolve uluk televisaun Timor-Leste nian ne’ebé Estado investe barak ona orsamentu. duke fo prioridade ba investor estranjerus atu loketan televisaun ida ho kontiudu sira nian,” dehan Nélio ba Business Timor foin lalais ne’e.

Nélio mos husu se MNC iha duni interese atu investe iha nasaun foun ne’e tenke loke mos oprtunidade ba timoroan sira atu kopera ho sira. “Nia tenki koopera ho ema timoroan, maske lei fo dalan hela atu estranjeirus iha saham (asaun) 100%,”dehan nia. Nia dehan nudar  membru governu nia iha preokupasaun katak  se investor loke agora, signifika Radio Televizaun Timor-Leste (RTTL) ema Sei la haree tan tanba intermus de kualidade no rekursu humanus  sei fraku teb tebes. Nia husu ba MNC atu  bele mos apoio RTTL hodi dezenvolve ba oin tan ho programa ne’eb’e kualidade, atu bele halo povu Timor-Leste urguillu ho ninia televisaun rasik ne’ebé ema timoroan maka servisu ba.

“Buat ida kompitisaun ne’e hakerak, ka lakohi sei akontese duni maibe tanba ita seidauk reforsa RTTL, nusa mak fo fali oportunidade ba rai seluk. Ami agora konsentrasaun maka’as hela atu dezenvolve RTTL. desenvolve RTTL, laos de’it atu haree lalais programas furak-furak hanesan tv one  no Metro tv. maibe ita tenke hatur kuadro legal sira ho rekursu humansu ne’ebé kualifikadu. tanba ne’e nudar membro Governu, ne’ebe tutela iha area ida ne’e, hau tenki buka meus atu estadu bele investe maka’as liu tan ba RTTL ho desenvolve nia an,” Eis xefe redasaun RTTL ne’e dehan. (BT)

Business Timor