PAGAMENTU PROJETU ESTADU PROSESA ONA

Ministru Obras Públika Transportes no Komunikasaun, Gastão de Sousa informa katak, kompañia barak mak iha ona prosesu kona-ba pagamentu ida ne’e, no osan ne’ebé mak Governu atu selu ne’e, US$ 6 miloens resin.

“Ami agora komesa kompensa ona, li-liu ba estrada sira ne’e prosesu la’o ona,”dehan Gastão Sousa ba jornalista sira iha Ministériu Finansas, Kuarta (16/9).

Gastão Sousa mós rezeita informasaun ne’ebé hatete katak, maioria projetu Estadu sira ne’ebé la’o iha teritoriu Timor laran tomak ne’e, kaer husi kompañia illegal hotu.

“Kompañia internasionál atu hetan mós, nia tenke tuir dalan ka konkursu mak hetan, se mak hetan projetu illegal hanesan emerjensia sira ne’e, ida ne’e mesak Timor-oan de’it,”esplika Gastão Sousa.

Alende ne’e, Gastão Sousa mós informa, kona-ba projetu emerjensia ne’e, MOP-TK iha ona dadus kona-ba Municipiu balu, maibé hein atu aprezenta ba Konsellu Ministrus hodi bele aprova.

Purtanto, Gastão Sousa mós esklarese katak, komite revizaun orsamentu mós aprova ona MOP-TK nia orsamentu ba tinan 2016.

“Orsamentu tuir pakote fiskal mai ami, US$ 125 miloens, ami iha adisionál ida US$ 49 miloens maibé foin mak aprova US$ 19 miloens, US$ 25 miloens ne’e, ami sei diskuti hela, li-liu ba manutensaun estradas nian,”informa nia.

Gastão Sousa dehan, orsamentu ida ne’e, inklui ona orsamentu ba hodi hadi’a estrada kapital Dili nian.

Gastão esplika, osan adisionál ba MOP-TK ne’e, atu haree kona-ba estrada no pontes sira ne’ebé mak a’at, tenke responde lalais.

“Ami nia prioridade ne’e, ba liu buat ne’ebé mak Governu define tiha ona hanesan, infraestrututas, no buat seluk tan,”tenik nia.cos

Jornal Nacional