PM timoroan desloka hosi Díli hodi partisipa iha Asembleia Jerál ONU nian

Primeiru-ministru timoroan, Rui Araújo, lidera delegasaun hosi Timor-Leste nebe desloka iha loron-tersa ne'e hosi Díli hodi partisipa, iha finál semana ne'e, iha Nova Iorke, iha simeira no iha Asembleia Jerál Nasaun Unidu nian.

Rui Araújo akompaña hosi ministru sira Negósiu Estranjeiru no Koperasaun nian, Hernâni Coelho, no hosi Planeamentu no Investimentu Estratéjiku nian, Xanana Gusmão, eis-xefe Estadu nian José Ramos-Horta, governadór hosi Banku Sentrál, Abraão de Vasconcelos, no elementu sira hosi Gabinete Fronteira Marítimu sira no hosi Sekretariadu g7+ nian.

Iha Nova Iorke, delegasaun timoroan sei partisipa iha simeira hosi Nasaun Unidu nebe sei aprova ajenda ba dezenvolvimentu pós-2015, entre loron 25 no 27 fulan-Setembru, no, hafoin ne'e, iha Asembleia Jerál ONU nian nebe sei hahú iha loron 28 fulan-Setembru.

Rui Araújo sei halo nia diskurus ba dala uluk hodi Timor-Leste nia naran iha loron 01 fulan-Outubru iha Asembleia Jerál Nasaun Unidu nian.

Iha loron-segunda ne'e Timor-Leste sai hanesan nasaun dahuluk ida nebe maka aprva Objetivu Globál foun sira ba Dezenvolvimentu Sustentável nian, nebe iha objeituv 17 nebe maka tenki aprova iha semana ne'e.

Objettivu sira (GGSD iha nia sigla inglés) negosia tiha ona durante tinan hirak ikus ne'e no karik sei aprova hosi Estadu 193 nebe partisipa iha reuniaun iha semana ne'e iha Nova Iorke.

Halibur área oioin, hakarak hetan, iha tinan 15 oinmai, objetivu boot tolu, liuliu hapara kiak maka'as, kombate hasoru dezigualdade no injustisa no kombate hasoru alterasaun klimátiku.

Iha komunikadu, Governu timoroan fó hanoin katak Timor-Leste "envolve maka'as iha prosesu nebe sei lori ba aprovasaun" objetivu sira ne'e, "hodi bele garanti katak objetivu sira ne'e hatán ba nesesidade sira hosi Estadu ki'ik sira nebe hanesan sensivel ba kontestu hosi nasaun sira nebe foin sai hosi situasaun sira konflitu nian".

Rui Araújo subliña, iha deklarasaun sira ba ajénsia Lusa, katak Timor-Leste iha ona esperiénsia balun iha implementasaun ba objetivu sira dezenvolvimentu nian nebe hetan daudaun nia di'ak iha meta balun, hanesan mortalidade inan ho oan nian. Medida sira nebe tama iha Objetivu sira Dezenvolvimentu Milénia nian, nebe tuir nia, aprova tiha ona antes Timor-Leste sai independente no nasaun ne'e integra ona iha nia polítika sira.

"Esforsu sira ne'e fó ba timoroan esperiénsia balun hodi bele adopta objetivu globál sira tanba relasionadu ho ita nia situasaun reál, ajustadu ho ita nia Planu Estratéjiku ba Dezenvolvimentu no uza sira hanesan dalan ba planeamentu no orsamentasaun anuál nian", nia afirma.

Delegasaun timoroan nebe halo viajen ba Nova Iorke sei partisipa mós iha eventu ruanulu resin hodi hatudu interese hosi Timor-Leste, inklui lansamentu hosi Inisiativa Polítiku ida apoiu nian ba Ezekusaun Ajenda Dezenvolvimentu Sustentável 2030 nian.

Iha ajenda delegasaun nian iha mós Simeira ida diálogu nian kona-bá konstrusaun hosi instituisaun di'ak sira, responsável sira no inkluzivu sira, hodi hetan dezenvolvimentu sustentável, Reuniaun hosi Líder Mundiál sira kona-bá Igualdade Jéneru no Fortalesimentu Feto sira nian, eventu ida kona-bá relasaun sira Timor-Leste nian ho ONU no Fórum hosi Líder Mundiál sira hosi Universidade Columbia nian kona-bá "Dezafiu Globál sira no nasaun ki'ik sira".

Sei hanoin mós enkontru sira entre Rui Araújo ho Prezidente Repúblika portugeza nian, Cavaco Silva, no ho sekretáriu-jerál ONU nian, Ban Ki-moon.

Hafoin ne'e, Rui Araújo sei ba Estadus Unidus hodi halo vizita ofisiál ida ba Kuba iha loron 02 fulan-Outubru, no fila ba Díli iha loron 08 fulan-Outubru.

SAPO TL ho Lusa