PROGRAMA POVU KUDA GOVERNU SOSA, FRETILIN KONSIDERA SLOGAN DEIT

Bankada FRETILIN konsidera Programa Povu Kuda Governu Sosa ne’ebé IV Governu pronunsia ne’e slogan deit, tanba iha realidade, povu kuda duni sira nian produtu maibé, Governu laba sosa sira nian produtu.

Deputada Bankada Partidu FRETILIN, Maria Angelica Rangel da Costa dos Reis hateten katak, komunidade sira iha Aldeia Manus Suku Taituda Postu Administrativu Alas, Munisípiu Manufahi nia produsaun to’o oras ne’e animal mak ba estraga tiha deit.

“Populasaun sira lamenta teb-tebes tanba sira to’os mesak bo-bo’ot deit, maibé Governu la ba sosa, no animal mak ba estraga hotu tan tiha”, hateten deputada Maria Angelica iha Plenária PN Tersa, (22/9).

Reprezentante povu ne’e hatutan katak, toos ne’ebé mak povu kuda ne’e, fahi fuik no lekirauk mak ba estraga hotu deit.

Alénde problema konaba programa povu kuda governu sosa, deputada ne’e mós levanta konaba problema, populasaun sira iha Suku Taituda ne’ebé durante fulan tolu ona la asesu ba liña eletrisidade. Nune’e mós eskola Eskola Filial ida iha Manus ne’ebé mak oras ne’e dadaun ninia kondisaun ladi’ak maibé seidauk hetan atensaun husi parte ruma.

“Eskola ne’e kondisaun ladun di’ak ona, tanba piku ne’ebé maka hodi halo eskola komesa dodok hotu ona, i nune’e mós fasilidade ne’ebé ba labarik sira hanesan karteira seidauk sufisiente ba sira”, deputada ne’e informa.

Nune’e mós Deputadu Manuel Gaspar hateten tan katak, sente triste tebes ho programa Ministériu Komérsiu Industria no Ambiente (MCIA) nian konaba Programa Povu Kuda Governu Sosa, ne’ebé mak laiha realidade nafatin.

“Ha’u triste tebes, ha’u haree iha televizaun Primeiru Ministru ba haree armajen iha Bebora ne’ebá hare 300 toneladas iha ne’eba ne’e tinan 5 ou 6 agora iha ne’eba hela to’o aat hotu,”katak deputadu Bankada Partidu FRETILIN ne’e.

Tuir Manuel Gaspar katak, programa povu kuda Governu sosa ne’e, la fó benefísiu ba povu.eni

Jornal Nacional