Hatama Ai Ilegal, Santos Selu Multa ba Estadu

DILI - Arguidu Santos Noronha ameasa selu pena multa ba estadu tanba hatama ai teka kubik tolu ilegal, neebe laiha lisensa husi diresaun floresta nasional nian.

Liu husi alegasaun final, Ministeriu Publiku husu ba tribunal atu aplika pena multa ba arguidu Santos Noronha tanba hatama ai teka laiha lisensa husi diresaun floresta. Iha julgamentu testamunha Atato Madeira neebe aprejenta keixa la marka audensia, maibe tribunal so rona deit testamunha husi defesa hanesan xefe aldeia 04 Foho Rai Bot Caicoli Agunstinho Pires neebe dehan katak, arguidu laos halo bisnis ba aiteka kubik tolu nee.

Maibe intensaun hola aiteka nee atu hadia nia uma. Ai kubik nee kada kubik ho folin $400, kubik tolu nee hamutuk $1.200. Tanba nee MP husu atu aplika pena multa para nunee arguidu bele selu ai kubik tolu nee ba ambiente nian. Para nunee ai kubik tolu nee bele entrega fali ba arguidu. Entertantu parte defesa husu ba tribunal atu absolve arguidu husi krime nee.

Tuir akuzasaun neebe tribunal lee sai katak, iha loron 24 fulan Outobru 2013  mais menus tuku 10:30 otl iha ekipa investigasaun simu ordem verbal husi inspektur xefe Mateus da Costa Teixeira katak sidadaun Timor oan ida tula ai teka ilegal husi distritu Covalima tama mai Dili. Ekipa nee ba iha fatin refere hodi halo klarifikasaun no iha realidade hetan duni arguidu hatama ai ilegal neebe laiha lisensa husi diresaun floresta nasional. Ho ida nee Ministeriu Publiku akuza arguidu ho krime ambiente neebe previstu iha artigu 215 numeru 1 no agravasaun artigu 216 numeru 1 alineia b kodigu penal TL nomos regulamentu Untaet 17/2000 artigu 1-5. Informasaun kompletu iha STL Jornal no STL Web, edisaun Kinta (17/12/2015). Domingas Gomes

Suara Timor Lorosae