TINAN 4 TAN OSAN MINA-RAI HOTU – PM RUI: FUNDU NE’E VIDA NASAUN

Diretor Exekutivu Luta Hamutuk, Mericio Akara hateten katak, fundu mina-rai Timor-Leste (TL) nian ne’ebe oras ne’e hamutuk $16 bilioens, tinan hat (4) tan osan hirak ne’e sei hotu.

Mericio Akara dehan, fundu mina-rai trimestre ikus fulan Dezembru, tinan 2015 ho $16.22 bilioens, maibe iha fulan Janeiru, tinan 2016 tun kedas ba $16 bilioens.

“Ita nia osan mos laiha ona, iha fulan Dezembru 2015 nian ne’e iha $16.22 bilioens maibe agora ba Janeiru ne’e tun $16 bilioens deit ona, ne’e tun ba bebeik ne’e tinan hat (4) tan ((2020)) osan hotu ona,”afirma Mericio Akara ba Jornalista iha salaun Ministeriu Negosius Estranjeirus no Kooperasaun Praia dos Coqueiros, Dili, Segunda (16/02).

Ba kestaun ne’e, Akara preokupa maka’as orsamentu $50 milloens ne’ebe maka Governu impresta hosi Governu China atu hadia drainazen sira iha kapital Dili.

Tuir Akara, maske osan ne’e Governu impresta prioridade duni atu   halo drainazen, maibe to’o agora Ministeriu Obras Publikas Transporte no Komunikasaun (MOPTK) labele rezolve drainazen sira hotu iha Dili, ne’e maka to’o agora udan mai be foer kontinua sa’e hodi kria inundasaun ba komunidade nia hela fatin.

“Impaktu iha. Tanba ita deve ne’e ita tenki selu fila-fali ema nia osan ne’e, depois mos tenki fo servisu ba Timor oan. La’os impresta tiha osan ema maka servisu fali,”haktuir Akara.

Nune’e, Akara iha nia observasaun ba projetu sira ne’ebe maka la’o iha Dili laran halo hosi kompañia sira ne’e la’o duni, maibe Ajensia Dezenvolvimentu Nasional (ADN) ladun halo fiskalizasaun, tanba ne’e maka tinan ba tinan ema sempre kestiona kualidade obra.

“Ami tinan-tinan kestiona sai baruk. Setor privadu ida-idak la’o ninian, depois monitorizasuan hosi MOPTK no ADN la forte. Ita iha Dili ne’e tau matan ita sai baruk tiha deit,”dehan Akara.

Fundu mina-rai vida nasaun

Nune’e mos, Primeiru Ministru (PM), Rui Maria de Araújo afirma katak, fundu petroliu ne’e sai hanesan sangue de vida nasaun Timor Leste nian.

“Ita hotu hatene katak, fundu petroliu ne’e sai hanesan sangue de vida nasaun ne’e nian,”esplika PM Rui wainhira abertura reuniaun kona-ba fundu petroliu iha Ministeriu Negosius Estranjeirus no Kooperasaun Dili.

Tuir PM Rui, iha kestoens balun ne’ebe relasiona ho Timor Leste nia politika no oinsa Timor Leste halo investimentu kona-ba utiliza fundu petoliu, entaun hola inisiativa halao sesaun hodi partilha informasaun.

“Ita hotu parte interesadu sosiedade Timor Leste nian haree oituan informasaun saida maka iha kona-ba oinsa fundu ida ne’e hala’o nia jestaun, depois politika saida maka prinsipiu atu halo jestaun nia kotuk, akompanha oituan dezenvolvimentu ekonomia mundial nian, haree mos pozisaun ita nia a’an ho intesaun,”hatutan PM Rui.

Partisipa iha reniaun fundu peroliferu ne’e maka, membru Governu sira, Sosiedade Sivil, estudante husi Universidade da Paz (UNPAZ).

Iha parte seluk, Vise Ministru Finansas, Helder Lopes informa, enkontru ida ne’e oinsa atu fo sai informasaun kona-ba Estadu jere orsamentu fundu petroliferu. Liu-liu liga ho investimentu iha rai laran liu hosi orsamentu Estadu no mos liu hosi investimentu iha merkadu finanseiru internasional.

“Ita halo tanba mosu preokupasuan dehan, ita nia dezempenhu ba fundu petoliferu tinan kotuk ladun diak, no presu mina rai tun, ne’e oinsa ita haree ajusta ita nia orsamentu ba iha presu mina rai ne’e nomos Governu nia reasaun hasoru mudansa iha finanseiru internasional,”haktuir Helder Lopes.avi

Jornal Nacional