Ema rihun resin maka protesta iha Díli hasoru Austrália tanba fronteira tasi nian

Ema rihun resin maka halo manifestaun, iha loron-tersa ne'e, iha embaixada Austrália nia oin iha Díli hodi husu delimitasaun ba fronteira tasi nian ho Timor-Leste, ne'ebé karik sai hanesan manifestasaun boot liu iha nasaun hafoin independénsia, haktuir hosi organizadór ida.

Ativista rihun sanulu resin, estudante sira no membru antigu sira hosi rezisténsia timoroan halo manifestasaun iha embaixada Austrália nia oin iha kapitál Timor-Leste nian, hatete ba AFP hosi kordenadór ida protestu nian, Juvinal Dias, hosi Movimentu Hasoru Okupasaun iha Tasi Timor.

"Ne'e karik hanesan manifestasaun boot liu ne'ebé maka ita asisti hahú hosi deklarasaun independénsia nian", hatete hosi Juvinal Dias ne'ebé hametin katak protestu ne'e organiza hosi populasaun no "la'ós hosi Governu".

Juvinal Dias hatete katak manifestante sira hakarak atu Austrália respeita lei internasional no fila fali ba negosiasaun sira kona-bá fronteira marítimu ho "laran di'ak".

Reprezentante sira hosi manifestante sira husu ona atu hasoru malu ho embaixadór australianu ka hosi diplomata sira seluk maibé solisitasaun ne'e hetan rekuza nune'e maka sira husik karta ida iha Embaixada.

Iha loron 29 Fevereiru, primeiru-ministru timoroan fó sai katak Governu australianu lakohi atu negosia ho Timor-Leste kona-bá fronteira marítimu sira no insisti atu akordu atuál hodi fahe rekursu sira iha Tasi Timor kumpri obrigasaun internasionál sira.

Rui Maria Araújo hatete ba Lusa katak ne'e maka hanesan pozisaun ne'ebé nia homológu australianu, Malcolm Turnbull, transmiti ba nia iha karta ida hodi hatán ba pedidu timoroan nian hodi hahú negosiasaun sira.

"Mantén pozisaun kona-bá fahe rekursu sira, ne'ebé halo daudaun liuhosi CMATS [Tratadu kona-bá Determinadu Ajuste Marítimu iha Tasi Timór]", nia hatete.

CMATS asina tiha ona entre Díli ho Canberra, maibé Timor-Leste deklara ona inválidu tanba atividade sira espionajen ne'ebé Austrália halo.

Akordu ne'e haree katak "royalties" no reseita sira seluk iha zona abranjidu, inklui kampu ida ne'ebé nakonu ho gás natural Greater Sunrise, fahe iha parte hanesan entre nasaun rua ne'e. Bainhia fronteira marítimu ida defini tiha ona, kampu ne'e bele hela tomak iha bee timoroan sira nian.

Maski hosi pozisaun australianu, Rui Araújo hatudu "konfiante", hodi afirma katak Timor-Leste sei "tenta dalan hotu-hotu" hodi lori Canberra "ba meza negosiasaun nian".

Iha loron hanesan, iha diskursu ida, Rui Araújo subliña ona katak delimitasaun ba fronteira sira tasi Timor-Leste nian ho nia viziñu sira, Austrália ho Indonézia, la koresponde ba objetivu ruma hosi fahe rekursu sira.

"Ami ko'alia fronteira definidu sira, no parte ida-idak iha nia rekursu sira. Ne'e tenki sai klaru", nia hatete.

"Defini la'ós buka fahe rekursu sira. Ne'e la'ós hanesan kestaun. Kestaun maka soberania", nia hatutan no akuza Austrália hodi hakarak obriga Timor-Leste hodi fahe rekursu sira.

SAPO TL ho Lusa – Foto: Ema rihun resin maka protesta iha Díli hasoru Austrália tanba fronteira tasi nian. EPA@ António Dasiparu