LERE: POVU AGORA MATENEK

DILI - “Ita nia povu agora matan moos, ita nia povu agora matenek maduru, krije 2006 hanorin ema barak,” Xefe Estadu Maior Jeneral FALINTIL-Forsa Defeza Timor-Leste (F-FDTL), Maijor Jeneral, Lere Anan Timur.  

Ba jornalista sira hafoin sorumutu ho Prezidente Repúblika, Taur Matan Ruak, iha Palásiu Prezidensial, Bairo-Pite, Dili, Kuarta (06/04), Lere ho diplomasia afirma, krije 2006 mak mosu tan iha 2017 barak dala ruma tensaun sa’e mate de’it.

“Tanba ita atu ba ne’ebé, ita atu moris ba oin ka ita atu mate,” hatutan Lere hodi dehan nia la’ós  polítika, hanesan militar nia nafatin garante situasaun la’o kalma.

“Ha’u la’ós  polítiku, ha’u militar, ha’u hatene katak ha’u nu’udar komandante forsa armada nian, situasaun la’o kalma hanesan buat ida la akontese, mas ha’u sefose Jeneral att ida ita dehan katak ohin loron situasaun la hanesan ne’e mas ha’u lakohi,” afirma Lere.

Durante sorumutu ho Prezidente Repúblika, Lere haktuir, sira diskuti kona-ba polémika ezonerasaun. Nia husu ba Prezidente Repúblika ho governu tenki iha konsensu ba kazu ne’e.

“Ba ha’u, siñor Prezidente nein governu bele husu ha’u nia hakarak, se hakarak hela ka hakarak sai, ha’u hakarak iha konsensu,” hatete Xefe Estadu Maior Jeneral Forsa Armada ne’e.

“Ha’u hatete  ba siñor  Prezidente, interese nasionál ne’e mak importante, ha’u nia problema la’ós  importante, problema instituisaun la’ós  importante, so nasaun ejiste mak instituisaun bele iha, nasaun laiha instituisaun mós laiha,” subliña Lere.

Relasaiona ho informasaun ne’ebé públiku iha katak Maijor Jenerál sei rejigna-an, Maijen Lere hatete, kuandu laiha evidénsia lalika fiar tanba kuandu nia mak hakarak rejigna-an, nia rasik mak sei fó sai.

Antes ne’e Prezidente Repúblika, Taur Matan Ruak afirma, nu’udar xefe estadu kontinua rona informasaun hosi governu kona-ba polémika ezonerasaun, maibé  xefe estadu hanesan komandante supremu labele dada naruk situasaun ne’e, no iha tempu ida xefe estadu sei deside.

Entertantu governu ne’ebé lidera hosi Primeiru Ministru (PM), Rui Maria de Araujo kontinua halo esforsu oinsá  xefe estadu no governu bele intende malu iha kazu ezonerasaun ne’e.(dgx)

Timor Post