Governu timoroan asina iha loron-sesta projetu boot dahuluk hosi PPP ba Portu Tibar nian

Iha loron-tersa ne'e Governu timoroan fó sai katak sei asina iha loron-sesta kontratu ba konstrusaun no jestaun hosi Portu Tibar, avalia ho folin dolár millaun 400 no konstitui iha parseria dahuluk públiku-privadu (PPP) ho dimensaun boot iha nasaun ne'e.

Tuir informa hosi gabinete ministru Obra Públika, Transporte no Komunikasaun nian, Gastão da Silva, katak kontratu ho franseza Bolloré Consortium sei asina iha loron-sesta iha Díli.

Informasaun hosi kontratu analiza tiha ona iha fulan-Novembru tinan liubá hosi ezekutivu ne'ebé aprova ona dekretu-lei ne'ebé defini kondisaun sira hosi kontratu ne'ebé sei funsiona iha modelu parseria públiku-privadu, hanesan esplika tiha ona hosi primeiru-ministru, Rui Maria de Araújo, iha tempu ne'ebé ba jornalista sira.

Konkursu hodi harii Portu Tibar nian manán hosi empreza franseza Bolloré Consortium, ne'ebé hetan liu klasifikadu di'ak duké konkorente úniku seluk, ingleza Peninsular & Oriental Steam Navigation Company (POSNCO), subsidiáriu hosi DP World hosi Dubai.

Parseria públiku-privadu (PPP) dahuluk timoroan nian haree ba konstrusaun no jestaun durante tinan 30 iha Portu Tibar, ho folin dolár millaun 400 (euro millaun 344) no inklui konstrusaun hosi estrada ida entre Díli ho Tibar, kais embarkasaun ida, instalasaun sira iha rai no sistema sira drenajen nian.

Tuir ezekutivu, portu foun sei iha kapasidade tinan-tinan ba tonelada millaun ida no ho posibilidade simu embarkasaun komersial no pasajeiru sira nian.

Projetu hanesan polémiku la'ós de'it tanba nia folin maibé mós tanba nia lokalizasaun, tasi-ibun ida iha oeste kapital timoroan nian, ho krítiku sira defende ona katak alternativu ba konjestionadu Portu Díli nian tenki iha Portu Hera ne'ebé agora daudaun uza hosi komponente naval hosi Forsa Defeza sira Timor-Leste (FDTL) nian.

Ezekutivu konsidera projetu "hanesan prioridade ida ba prosperidade ekonómiku Timor-Leste nian iha futuru" no hanesan "projetu boot ida investimentu nain iha nasaun ne'e ho parte importante ida investe hosi empreza ne'ebé manán".

Portu hosi Tasi-ibun Tibar nian balun "sei selu liuhosi Fundu Infraestrutura sira no balun liuhosi empréstimu sira ne'ebé autoriza hosi Banku Mundial, Banku Europeu Investimentu nian, Banku Aziátiku Dezenvolvimentu (BAD) nian no parseiru multilateral sira seluk".

PPP sira iha futuru hanoin hela ba Sistema sira Abastesimentu Bee nian iha Díli - Konsellu Ministru sira analiza ona estudu ikus hosi pré-viabilidade no estudu viabilidade sei hahú iha inísiu 2016.

Projetu estreia iha Timor-Leste ba modelu PPP, ne'ebé sei aumenta neineik ba setór sira hosi transporte, enerjia, saúde no bee, hanesan hatete iha proposta hosi Orsamentu Estadu nian ba tinan oinmai.

Governu avalia daudaun PPP ida ba jestaun, operasaun no manutensaun hosi sentral elétriku rua ne'ebé harii iha Hera ho Betano. Iha fatin seluk, analiza hela "possivel parseria ho área privadu iha área saúde nian", refere hosi testu orsamental tinan 2016 nian.

SAPO TL ho Lusa