MS LANSA ZONA LIVRE TABAKU

WNTD: MS lansa zona livre tabaku, Primeiru Ministru hetan premio OMS nudar lider ba luta hasoru tabaku iha TL

Ministerio Saude (MS) oficialmente deklara ba publiku bandu fuma tabaku iha fasilidade saude hotu iha teritorio tomak, tanba fuma kauza ema hetan moras kroniku sira.

Ministra Saude, Maria do Ceu Sarmento Pina da Costa, hateten governu kria ona meus oioin atu prevene no proteze populasaun sira husi impaktu tabaku ne’ebe hahu bandu fuma iha fatin publiku sira. 

“Ita tenke hapara ona e dalan diak mak tenke bandu labele fuma iha fasilidade publiku sira, labele haruka oan sosa tabaku no hapara lok tabaku ba malu iha serimonia ruma,” Ministra Ceu hateten, iha serimonia lansamentu zona livre tabaku, iha Sentru Saude Veira Cruz, Dili. 

Nia dehan, kada tinan iha mundu ema nian 6 miliaun mak mate tanba fuma tabaku no ema 600 mil mak mate tanba fuma pasivu (horon sigaru suar). 

Nia informa, tuir dadus peskiza husi Ministerio Saude (MS) kona ba risku moras la hada’et iha tinan 2014, hatudu mane 71% ho idade (15-60) no feto 29% mak fuma ativu. 

Iha parte seluk dadus Global Youth Survey 2013, hatudu labarik (13-15) 66% mane no 24% feto agora dadaun ativu fuma tabaku. 

“Iha nesesidade duni ba governu atu hanoin hodi kontrola uzus tabaku, joventude barak mak fuma tabaku e ida ne’e sei fo impaktu negative tebes ba sira nia saude,” nia preokupa. 

Nia hatutan, asaun ne’ebe hanesan sei hala’o mos iha fatin publiku seluk (eskolas, edifisios publiku, restorante no transportes publiku), tanba lei fo dalan atu proteje ema husi tabaku. 

Kona ba mekanizmu kontrolu, nia dehan, MS koopera ho instituisaun kompetente sira (autoridade lokal, Polisia Nasional Timor –Leste) no entidades hotu atu kontrolu iha fatin no transporte publiku sira. 

Entretantu reprezentante ida hosi Organizasaun Saude Mundial (OSM) iha Timor –Leste, doutor Arun K. Mallik, hateten epidemia tabaku la’os deit iha Timor –Leste maibe sai mos problema bo’ot mundial ne’ebe saude mundial hasoru.

“Tanba kada tinan oho ema kuaze 6 milaun,” nia hateten. 

Kona ba dadus estatistika ne’ebe iha, nia dehan, Timor-Leste kategoria nasaun ne’ebe prevalensia uzu tabaku aas iha regiaun Sudeste Aziatiku. 

Nia informa, kada tinan OSM Regiaun Sudeste Aziatiku fo award Loron Mundial La Fuma hanesan rekonesmentu ida ba ema individu no organizasaun sira ne’ebe fo ona kontribuisaun ba kontrolu tabaku iha kada pais. 

Enkuantu iha tinan ida ne’e OSM Regiaun Sudeste Aziatiku deside fo award ba Primeiru Ministru (PM) Timor –Leste, doutor Rui Maria de Araujo hanesan rekonesementu ida ba nia inisiativu no seriedade atu kombate epidemia tabaku iha Timor –Leste. 

Iha selebrasaun loron mundial la fuma tinan kotuk (2015) governu liu husi Primeiru Ministru no Komissaun Servisu Publiku hasai sirkular ida hodi bandu ema fuma iha fatin publiku sira inklui nia mos konsege hamosu dekretu lei ida hodi kontrola uzus tabaku iha Timor –Leste, ne’ebe agora daduan sei iha meja Prezidente da Republika hodi hein promulgasaun. 

Entretantu Koordenador Organizasaun Alianca Nasional Controlu Tabaku, Mateus Lemos Soares, kongratula ba governu liu husi PM ne’ebe iha ona seriedade atu kontrolu uzus tabaku iha Timor –Leste.

“Tanba dadus hatudu, Timor –Leste iha situasaun ne’ebe frazil tebes ba impaktu tabaku e ami orgulho bo’ot,” nia orgulhu.

Kona ba dadus ne’ebe maioria jovens fuma tabaku, nia dehan, ida ne’e tanba falta de kontrolu husi ogaun kompotente sira kona ba sirkulasaun no uzus tabaku iha rai laran.

The Dili Weekly