TL-AUSTRALIA LA KOOPERA MALU, ONU MAK HILI PREZIDENTI KOMISAUN DFT

Timor Leste (TL) ho Australia lakohi koopera malu hodi hili Prezidenti Komisaun Delimitasaun Fronteira Tasi (DFT) atu lidera diskusaun fronteira tasi entre rai rua ne’e, maka Sekretáriu Jeral Organizasaun Nasoens Unidas (ONU) mak sei hili Prezidenti Komisaun. Tanba tempu atu hili Prezidenti Komisaun ne’e semana ida deit.

“Semana oin (22/6), ita tenke hili ona Prezidenti, hodi komisaun ne’e bele la’o ba oin. Tuir régra katak, mak la hili, Sekretáriu Jeral ONU mak sei hili ba Australia ho Timor Leste,” informa Primeiru Ministru Interinu, atual Prezidenti Konsellu Ministrus, Hermenegildo “Agio” Perreira ba jornalista sira iha Palácio Prezidente Aitarak Laran Dili, Kinta (16/06).

Maibé Agio Perreira dehan, to’o agora Australia mós koopera hela, i depois hili tiha Prezidenti komisaun, sira sei iha tempu tinan ida atu entrega relatóriu ba ONU.

Oras ne’e dada’uk, Australia ho Timor Leste (TL) hili ona sira nia konsiliador ba kazu ida ne’e, maibé entre sira tenke tuur hamutuk hodi hili ema ida sai Prezidenti Komisaun.

“Asuntu ne’ebé ami ko’alia tan mak, konsiliasaun obrigatóriu ho Australia la’o di’ak hela, tanba Australia mós hili ona sira nia ema na’in rua, ita mós iha rua ona, agora tenke hili mak Prezidenti,” informa Primeiru Ministru Interino ne’e.

Maibé Agio Perreira dehan, fiar katak, iha loron ne’ebé determiniadu ona ne’e, Australia ho TL sei bele hili Prezidenti ba komisaun ida ne’e.

Agio dehan, ida ne’e prosesu foun ida ba TL, tanba TL foin primeiraves halo ida ne’e.

“Komisaun obrigatóriu ne’e, iha lei tasi nia laran ne’e, hatama duni ba situasaun hanesan ita nian, ne’ebé rai ki’ik ida, nia viziñu bo’ot teb-tebes, maibé viziñu lakohi ko’alia delimitasaun fronteiras,” katak Agio.

Prezidenti Konselu Ministrus ne’e esplika, obrigatóriu ne’e dehan katak, maske Australia lakohi mós, tenke la’o ba oin nafatin.

Agio dehan, Prezidenti Repúblika, Taur Matan Ruak agradese tebes, tanba Taur Matan Ruak hatene katak, Governu kaer prosesu ne’e la’o ba oin.

“Husi Estadu Timor Leste, ha’u rasik mak sai hanesan ajente Timor Leste, ha’u servisu ho ajente Australia nian, hodi hala’o prosesu ne’e didi’ak, atu labele atraja,” dehan Agio Perreira.

Alende ne’e, Primeiru Ministru, Rui Maria de Araújo mós informa katak, prosesu diskusaun ba  disputa fronteira marítima entre Timor Leste ho Australia ne’e, kontinua la’o nafatin.

 “Ha’u hakarak hateten ba ita bo’ot (jornalista) sira katak, tuir régras konsiliasaun ninian, prosesu ne’ebé hala’o ne’e, labele fó sai ba públiku, mas buat ne’ebé ha’u bele hateten mak ne’e, Timor Leste hili ona konsiliador, Australia mós hili ninian ona, agora sira nain rua tuur hamutuk atu hili ema ida atu sai sira nia Prezidenti,” relata Xefi Governu interinu ne’e.cos

Jornal Nacional