TUDA FATUK SUBAR LIMAN…!!!

Jornal Nacional, editorial

Setor privadu nudar parseiru importante Governu nian tamba setor privadu mak sai liman ain governu nian hodi ezekuta projetus fisiku no nonfisiku nebe parlamentu atribui ba governu atraves Orsamentu Jeral Estadu anualmente hodi desenvolve pais nee.

Iha ambitu parseria nee, governu konsidera setor privadu, li-liu setor imprezarial Timor Leste nian seidauk forte tamba parasit (depende) liu ba investementu publiku, iha kontektu nee,  projetu governu nian.

 “Ita  rekoñese katak, Timor Leste oras ne’e dadauk  setor emprezarial seidauk forte sei presiza apoiu maka’as, sei presiza hetan oportunidade barak liu tan,” Primeiru Ministru, Rui Maria de Araújo, publikasaun Jornal Nacional Diario, edisaun 13/06/2016.

Rekoñesementu governu nian ba situasaun real setor imprezarial Timor nian nee simu ho negativu pratikante sira setor privadu no setor imprezarial hodi nunee konsidera Primeru Ministru koalia barak, laharee ba realidade moris emprezarial iha Timor.

‘’Hau hanoin Primeiru Ministru, Rui Maria de Araújo hasai deklarasaun ne’e sala, tanba wainhira   setor privadu la forte, maka Governu la forte…,”. Diretor Ruvic Construction, Rui Castro.

Los duni, saida mak senhores sira koalia nee, ida idak ho ninia razaun. Xefi governu koalia parte governu nian konesimentu durante nee katak kompaniha rihun ba rihun mak rejista iha SERVE, hasai linsensa aktividade maibe barak mak laiha aktividade negosiu, barak laiha kapasidade finanseiru, barak mak laiha dirasaun nebe klaru no mos barak mak hein deit projetu estadu nian.

Tan nee karik pontu de vista governu katak kompanhia rihun ba rihun nee mak hotu hotu pelomenus iha aktividade negosiu, kontribui tebes ba desenvolvimentu sosio ekonomiku iha rai doben ida nee.

Agora parte setor privadu mos labele senti an demais ka senti ofendidu tamba realidade setor emprezarial barak mak hein duni projetu governu, lakohi halo investementu iha rai laran. Emprezario sira timor oan nebe berani dezafia ninia an halo investementu iha rai laran nee sura ho liman fuan.

Lalika subar realidade, kompanhia barak, li-liu kompanhia bo-bot sira  mak hein deit projetu estadu, labrani diversifika investimentu ho razaun seguransa, falta lei, razaun oi-oin deit hodi komprova ninia tauk.

Maibe mos governu tenki louva empresario timor oan nebe berani foti resiku hodi investe sira nia kapital hodi diversifika sira nia negosiu, atu nunee labele jeneraliza kulpa setor emprezarial tomak.

Iha parte seluk, atu forte ka fraku sentor imprezarial, li-liu emprezario timor oan sira nee  depende mos ba oinsa governu kria kondisaun ba emprezario nasional sira, oinsa hafisil sira atu hetan projetu estadu.

Nunee mos pagamentu labele atraza, tamba agora emprezario timor nian nee halo obra ruma impresta osan tun sae ho juros boot, nebe governu selu tarde, juros imprestimu aumenta, ikus mais osan sira selu hotu ba osan impresta, emprezario nee kontinua hela ho zero.

Ne’ebe governu labele haree deit ema seluk ninia sala, kompanhia sira nee ninia frakeza maibe governu laharee ba ninia an katak buat barak mak governu halo hamate emprezario sira.

Nunee mos mosu fenomeno ida katak fo projetu ba kompanhia internasional mak manan hetan porcento osan bolsu nian diak liu duke fo projetu ba maluk timor oan nebe fo oituan deit, pior liu tan, resiku seluk bele kesar ba Komisaun Anti Korupsaun.*