Relasaun TL-Austrália Di’ak

DILI, (ANTIL) – Akademista Universidade Díli, Cesaltina Angêla Soares hateten, relasaun diplomátika entre Austrália no Timor-Leste (TL) di’ak maske agora nasaun rua ne’e disputa hela kona-ba liña fronteira marítima.

”Kontestu relasaun bilaterál, ohin ladi’ak aban bele di’ak, ohin di’ak aban bele ladi’ak, ne’e dinamika relasaun ne’ebé akontese iha mundu. Ita nia konstituisaun garante, se de’it maka ita halo relasaun di’ak ita di’ak ba sira”, Dekana Relasaun Internasionál UNDIL ne’e iha nia eskritóriu ba ANTIL, Kinta (1/9).

Relasaun Internasionál ne’e konsagra iha Konstitusaun RDTL, artigu 8o alinea 4 katak Repúblika Demokrátika Timór-Leste hala’o nafatin nia relasaun ba belun espesiál no ho harosan ho nasaun viziñu sira no ho nasaun hirak ne’ebé iha rejiaun laran.

Tuir nia, negosiasaun tuur iha meza la’ós solusaun di’ak hotu de’it. Negosiasaun ne’e, iha solusaun ne’ebé bele benefísiu ba parte rua no seluk bele laiha solusaun ba parte rua.

Nia esplika, legalmente tuir lei ka konvensaun internasionál tasi nian, TL iha direitu maibé Austrália hanesan nasaun boot no dezenvolvidu hakarak manten pozisaun hodi aproveita rekursu TL nian.

Ho nune’e, estadu TL la-sente benefísiu, nune’e lori Austrália ba tribunál internasionál Haia, Den-Hag, Olanda.

Nia hatutan, infelizmente to’o agora seida’uk iha klareza ba disputa marítima ne’e no difikuldade ne’ebé TL sei iha maka seidauk iha sansaun husi komunidade internasionál atu fó presaun ba Austrália atu halo tuir ita nia hakarak, tantu arbitrajen internasionál tantu nasaun unida.

Tanba ne’e nia hatete, governu, sosidade sívil, relijiozu, akadémiku no parte hotu hamutuk atu hatete ba mundu intenasionál katak ita defende ita nia dignidade soberania estadu Timor-Leste nian.

Kestaun disputa fronteira marítima, antes ne’e, TL liuhusi ministru negósiu estranjeiru, Hernâni Coelho deklara ba mídia sira katak kestaun fronteira buat ketak ida maibé relasaun entre Timor-Leste (TL) no Austrália la’o normal nafatin. (jornalista: Rafy Belo; editora: Rita Almeida)

Foto: Cesaltina Angela Soares