VETERANUS MERESE TRATAMENTU ESPESIAL

Komunidade Suku Samalari, Postu Administrativu Laga, Munisípiu Baucau husu ba Estadu tenki tau matan espesial ba veteranus tanba sira maka fundasaun no patrimósiu nasaun no Estadu nian.

Tuir komunidade sira katak, durante ne’e tratamentu saude ba veteranu sira iha Timor laran tomak, Estadu ladun fó tau matan. Maibé tuir loloos veteranus ba merese duni atu hetan tratamentu especial.

“Veteranus sira nia saúde ne’e, presiza tratamentu espesífiku no espesiál, tanba sira mak merese ba tratamentu ida ne’e, no sira mós iha direitu atu hetan tratamentu espesial iha nasaun ida ne’e,” hateten komunidade Mário Almeida husi Suku Samalari-Laga, wainhira partisipa iha diálogu komunitári ho Prezidenti Repúblika (PR), Taur Matan Ruak, iha Suku Samalari Segunda-feira (12/09).

Mário Almeida hatutan katak, veteranus sira fó ona sira nia vida tomak atu liberta povu no rai ida ne’e.

Alénde ne’e, Mário Almeida mós hateten katak, malnutrisaun ba labarik tinan lima mai kraik iha Timor Leste (TL) ne’e, ba futuru sei maka’as liu tan, tanba sistema saúde iha TL ne’e seida’uk di’ak.

Hatán ba kestaun ne’e, PR Taur Matan Ruak hateten katak, Estadu tau matan hela ba saúde veteranu sira nian, maibé veteranu sira mak lakohi hakbesik-an ba doutor sira.

“Ita agora iha ekipa ida husi Hospital Nasionál Guidu Valadares (HNGV) atu tau matan ba veteranus sira, maibé sira la koñese veteranus sira ida, entaun veteranus mak tenki hakbesik-an ba sira. Ami ba hetan veteranus sira iha foho leten no rai lolon sira, ema nunka tau matan, sira moras todan tiha mak ema lori mai,” katak Taur Matan Ruak.

Tanba ne’e, Taur Matan Ruak fó orientasaun ba autoridade lokal sira katak,  agora ba oin, sira tenki foti dadus povu nian atu hatene, povu nia saúde hodi halo tratamentu.

“Ha’u hakarak fó apelu ida ba veteranus sira atu labele hadok-an husi doutor sira, tanba realmente iha Timor laran tomak, veteranus sira moras atu mate ona mak halai mai hospital,” dehan Taur Matan Ruak.

Alénde ne’e, Xefi Estadu ne’e mós dehan, problema saúde li-liu malnutrisaun iha TL ne’e, problema bo’ot ida, tanba 50% populasaun TL, malnutrisaun.

“Maibé ita nia Ministériu Saúde servisu maka’as, para ita nia oan sira ninia kresimentu no moris i saúde tenki di’ak, tanba sé ita la kuidadu, entaun ne’e problema bo’ot ida ba sira nia furutu aban bainrua,” katak Taur Matan Rauk.cos

Jornal Nacional