Bispu Ximenes Belo rekoñese susar sira Timor-Leste nian iha tinan 20 nia laran

Bispu katóliku timoroan Ximenes Belo rekoñese ona, hahú hosi loron ne'ebé ina simu Prémiu Nobel Dame nian, hamutuk ho José Ramos-Horta, iha loron-tersa liubá halo tinan 20, katak Timor-Leste hasoru susar oioin.

Iha deklarasaun sira ba Lusa, liuhosi telefone, hahú hosi Porto, ne'ebé agora daudaun hanesan nia fatin rezidénsia, Ximenes Belo konsidera ona katak tenki "haklean liu konseitu dezenvolvimentu nian" no avalia "rezultadu sira hosi independénsia no auténtika dame" iha Timor-Leste.

Liutiha dékada rua nian laran ahfoin hetan Nobel Dame nian ba lian rua hosi rezisténsia Timor-Leste nian - bainhira falta tinan neen ba independénsia efetivu hosi nasaun ne'ebé okupa hosi Indonézia -, "iha situasaun balun ne'ebé ladún haksolok", rekoñese hosi bispu.

"Sei iha konflitu sira, [...] ideolójiku sira no entre ema sira, liuliu iha nível justisa" no tenki hadi'a dezenvolvimentu, "distribuisaun hanesan" no "respeitu ba sasán sira nasaun nian", nia konsidera.

"Bainhira iha korupsaun, bainhira iha desviu sira, ita sei laiha dame auténtiku", hatutan hosi bispu ne'ebé simu Nobel Dame nian iha loron 11 Outubru 1996 no hatete katak Timor-Leste tenki "halo nia dalan, dezenvolve aan" no "serbisu hodi dezenvolve nasaun".

Iha fatin seluk, komunidade internasional "apoia nafatin" Timor-Leste, "maibé apoiu liu bainhira iha problema sira, konflitu sira", lamenta ona hosi bispu. "Bainhira laiha konflitu sira, buat hotu hanesan hakmatek. Tenki ajuda iha konflitu sira no mós iha momentu sira dame nian", nia defende.

Iha kontestu ne'e, Ximenes Belo felisita ho provável eleisaun António Guterres nian ba sekretáriu-jeral ONU nian - ne'ebé sei konfirma hosi Asembleia Jeral iha loron-kinta -, hodi hanoin hikas nia nu'udar governante portugés ne'ebé "fó hakat forte ida hodi rezolve problema Timor-Leste nian".

Bispu timoroan fiar katak Guterres sei halo "serbisu di'ak ba ema sira", tanba "nia hatene problema sira hosi laran", tanba esperiénsia ne'ebé iha bainhira nia kaer knaar nu'udar Komisariadu Aas hosi ONU nian ba Refujiadu sira.

Ximenes Belo hein atu Guterres dedika hodi "rezolve problema sira refujiadu sira nian no, iha tempu hanesan, serbisu ba dame no ba dame internasional nian".

Ximenes Belo, maski lakohi tama iha apresiasaun ba imajen atuál Vatikanu nian, rekoñese ona katak Francisco hanesan "papa ida ne'ebé besik ba ema sira", maibé nia konsidera katak ne'e la to'o.

"Papa ida-idak iha nia misaun, iha nia karakterístika. Igreja kontinua la'o ba oin ho papa A ka papa B. Igreja agora adapta aan, depende hosi ema kristaun tomak hosi mundu inteiru, la'ós de'it hosi papa", nia hatutan.

Timor-Leste agora daudaun selebra tinan 20 hodi hanoin hikas atribuisaun Prémiu Nobel Dame nian ba José Ramos-Horta no Ximenes Belo ho eventu oioin maibé bispu la halo viajen to'o nia nasaun tanba kestaun saúde nian.

Ximenes Belo rezigna hosi dioseze Díli, kapital timoroan nian, iha tinan 2002, hela iha uma ida hosi kongregasaun Salesianu sira nian iha Porto. Ho tinan 68, dedika nafatin ba investigasaun no hakerek. Iha loron hirak tuirmai, sei lansa livru ida kona-ba Carlos da Rocha Pereira, saserdote hosi Açores ne'ebé hela ona iha Timor-Leste durante tinan 50 nia laran.

SAPO TL ho Lusa