Kazu Kalbuadi, Carmelita Kestiona Servisu MP

DILI, (ANTIL) - Deputada Partidu CNRT, Carmelita Caetano Moniz kestiona servisu Ministériu Públiku (MP) relasiona ho akuzasaun Francisco Kalbuadi Lay (atual Ministru Turismu Arte no Kultura) no Jacinto Rigoberto.

Tuir Carmelita, MP nia akuzasaun liu tiha ona tempu. “Kuandu krime ho nia akuzasaun tinan 5 ne’e tenki halo investigasaun dentru de 4 anos maibé bainhira dentru de 4 anos la halo investigasaun signifika prasu liu “Kaduka” agora kestaun mak ne’e durante 4 anos ne’e Ministériu Públiku halo saida hodi la halo investigasaun,” Carmelita Caetano Moniz kestiona liu hosi ANTILiha Parlamentu Nasionál, foin lalais ne’e.

Carmelita duvida hodi dehan, akuzasaun ida ne’e halo bainhira besik elisaun ne’e liu ona tempu.

Francisco Kalbuadi Lay ho Jacinto Rigoberto obrigadu nudar arguido tanba iha tinan 2012, Partidu CNRT ne’ebé lideradu hosi Kay Rala Xanana Gusmão halo nia aktividade angreasaun fundus. Aktividade  refere mós la viola lei partidu Polítiku.

“Aktividade ne’e iha nia transparensia, tanba ami halo transmite direita liuhosi Televisaun Timor-Leste, ema hotu-hotu asiste,” Carmelita fó hanoin.

Bazeia ba lei partidu polítiku iha parte ida mós bandu atu pessoa kolektiva ou kompaña fó nia kontribuisaun direita ba partidu. Ho nune’e Partidu CNRT hasai desizaun ida hodi diside katak, se karik iha aktividade ne’e kompaña balun hatama osan iha konta bankaria Partidu nian, tenki fó fila.

“Iha faktus no kompaña sira momentu ne’e hatama osan, partidu fó fila. Bazeia ba akuzasaun ba Ministru Kalbuadi ho Jacinto Rigoberto (Vice Sekretariu Jeral CNRT) ba kompaña ida ne’ebé hatama osan ba konta bankaria ho anonimu,” Carmelita esplika.

CNRT rasik la hatene atu halo saida iha monentu ne’e atu fó fila osan tanba osan nain ne’e fontes anonimu. Ho kazu ida ne’e mak ohin loron ne’e Francisco Kalbuadi Lay ho Jacinto Rigoberto hetan titlu arguido, maske iha prosesu investigasaun arguido nain rua halo ona esplikasaun iha Ministériu Públiku.

Francisco Kalbuadi Lay, iha tempu ne’e ba hanesan prezidenti komisaun organizadora ba kampaña Partidu CNRT. Jacinto Rigoberto nudar sekretáriu no tezureiro ba kampaña elitoral.

Francisco Kalbuadi Lay ho Jasinto Rigoberto sai arguido tanba keixa hosi Komisaun Nasionál Elisaun (CNE).

Maibé atu aselera prosesu Arguido Francisco Kalbuadi Lay  tenki halo levantamentu imunidade basa aktualmente assume kargu nudar ministru, tanba ida ne’e foin lalais Tribunál husu ba Parlamentu Nasionál hodi halo levantamentu imunidade atu submete ba prosesu justisa nian.

Dezisaun Imunidade ba Francisco Kalbuadi Lay iha tempu besik sei diside iha plenaria maibé prosesu hotu oras ne’e trata ona hosi komisaun Parlamentu Nasionál.

Kazu Francisco Kalbuadi Lay no Jacinto Rigoberto relasiona ho atividade agreasaun fundus (malam dana) ne’ebe sira rua organiza ba partidu CNRT. (Jornalista: Manuel Pinto / Editor: Gantry Meilana) 

Foto: Carmelita Caetano Moniz