Chissano simu Grande Colar hosi Orden Timor-Leste ne'ebé fó iha 2009

Iha loron-segunda oinmai, antigu Prezidente mosambikanu Joaquim Chissano sei simu kondekorasaun hosi Prezidente Repúblika timoroan, Taur Matan Ruak, ho Grande Colar hosi Orden Timor-Leste nian, prémiu aas tabes hosi nasaun ne'e ba sidadaun estranjeiru sira.

Entrega Grande Colar hosi Orden Timor-Leste nian ne'e sei halo iha serimónia ida ne'ebé previstu iha Palásiu Prezidensial iha Díli iha loron-segunda dadeer, durante Chissano nia vizita iha Timor-Leste, ne'ebé sei to'o iha findesemana ne'e.

Kondekorasaun fó tiha ona ba Chissano iha loron 30 Maiu 2009 hosi Prezidente Repúblika, iha tempu ne'ebá, José Ramos-Horta - ne'ebé fó mós galardaun no iha tempu hanesan ba eis-Prezidente Repúblika portugés Jorge Sampaio no ba ONU.

Galardaun ne'e tenki fó rasik hosi Prezidente Repúblika rasik ne'ebé, tuir prezidénsia, hahú hosi tinan 2009 laiha oportunidade hodi entrega ba Joaquim Chissano.

Chissano, ho tinan 76, sei to'o iha Timor-Leste hodi partisipa iha eventu oioin ne'ebé halo hodi selebra tinan 20 atribuisaun Prémiu Nobel Dame nian ba timoroan na'in rua José Ramos-Horta ho Ximenes Belo.

Orden hosi Timor-Leste fó hodi "hatudu rekoñesimentu hosi Timor-Leste ba ema, nasional no internasional sira, ne'ebé, iha nia atividade profisional, sosial ka iha asaun espontáneu ho aten-barani, kontribui maka'as hodi fó benefísiu ba Timor-Leste, ba timoroan sira no ba Humanidade".

Iha fulan-Maiu, Taur Matan Ruak fó ona galardaun hanesan, ho títulu póstumu ka hafoin mate, ba antigu Prezidente mosambikanu Samora Machel, ne'ebé iha serimónia reprezenta hosi nia oan-mane, Samora Machel Junior.

Iha dekretu ba atribuisaun ne'e Taur Matan Ruak destaka Samora Machel nia knaar nu'udar "irmaun loloos hosi povu timoroan nian" no hanesan ema ida ne'ebé iha inísiu "senti sensibilizadu ho kauza hosi povu timoroan nian no hatudu apoiu tomak hosi Mosambike ba luta povu timoroan nian".

SAPO TL ho Lusa - Foto@ António Cotrim / EPA /Lusa