Tensaun Politika Tenke ho Pas

DILI - Eis Preziddente Repúblika Timor Leste Jose Manuel Ramos Horta afirma katak, iha nasaun demokrasia sempre iha tensaun polítika entre lider partidu polítiku sira, maibé ne’e normál ba nasaun demokrásia.

Hanesan públiku akompanha durante ne’e entre lideransa nasaun sempre krítika malu kona-ba oinsá konseptu hadi’a povu nia moris.

Hosi ideia hirak ne’e tanba, hosi lider nasaun nian ida-idak defende sira nia ideolojia partidu kona-ba oinsá atu dezenvolve nasaun no hadi’a povu nia moris.

Tanba ne’e tuir, eis prezidente repúblika, Ramos Horta dehan katak, tensaun polítika iha nasaun ida normál importante mak tenke garante nafatin pás, tanba Timor Leste passu ida atu hakat ba prosesu festa demokrasia iha tinan 2017.

  “Tensaun sempre iha kuandu ita halo polítika, hanesan partidu tolu sei iha tensaun maka’as, ne’e normál, hanesan ita halo jogu futébol sempre iha tensaun, ne’e normál, maibé ha’u lafiar katak iha konflitu, tanba lider bo’ot na’in tolu hanesan maun Xanana, maun Lu-Olo no maun Taur sei iha, tanba ne’e husu atu hametin pás” premiadu nobel ba pás ne’e hato’o ba jornalista sira iha salaun MNEK Marconi Rua Portugal eis Praia Coqueiros Dili, Sábadu, (8/10).

Ramos Horta dehan, iha nasaun demokrásia sei mosu kompetisaun entre partidu polítika sira liu-liu partidu boot, maibé hosi partidu sira hanesan CNRT, FRETILIN, PLP no PD nia ema mesak matenek no iha kredebilidade no iha autoridade tomak hodi hatete ba nia militantes no apoiantes sira atu labele halo violensia iha nasaun Timor Leste hanesan konflitu hirak ne’ebé mak akontese liu tiha ona.

“Ita bele diskute, haksesuk malu ho ideia, maibé labele iha konflitu, ne’ebé iha konfiansa ba lider bo’ot tolu ne’e atu hametin pás,” Horta hatete.

Maske nasaun iha seguran Polísia Nasional Timor Leste (PNTL), maibé di’ak liu lider boot sira hosi partidu polítiku boot sira atu hala’o seguransa hosi sira nia influensia ba apoiantes sira, nune’e labele hamosu violénsia.

Timor Post