Ró 15 hosi Xina Uza Bandeira RDTL Tama Ona iha Tasi Mane

DILI - Ró hamutuk 15 hosi Kompañia Hong Long hosi Xina oras ne’e dadauk halo hela atividade peskas iha tasi mane. Peskador ilegál sira hamutuk ró kuaze 20 haré hetan ró hirak ne’e komesa hakiduk.

Ró 15 ne’e governu maka kontrata. Hahú iha Domingu (20/11/2016) ró hirak ne’e to’o ona iha area tasi mane haré hetan ró peskas ilegál sura kuaze 20 na’ok hela ikan namanas iha tasi klaran. Liu loron hirak nia laran ró ilegál hirak ne’e balu dada-án ona.

Ministru Agrikultura no Peskas (MAP), Estanislau Aleixo da Silva hatete, prezensa ró 15 ne’e iha tasi mane fó impaktu pozetivu tebes. Aleinde kaer ikan hodi lori mai rai maran Timor Leste, indiretamente fó ameasa ba peskas ilegál sira tama iha area tasi timor.

“Tanba ne’e, ami kontaktu ona ministériu interior ho ministériu defeza, ami mesak labele atu ba duni ró sira ne’e, ne’e duni ita kopera para hodi ba duni sai tiha (ró ilegal sira), maibé ha’u  simu ona informasaun iha ró peskas ilegál  20 ne’e iha balun hahú  dada-án ona,” Estanislau haktuir ba Timor Post iha Timor Plaza, Komoro, Dili, Kuarta (14/12).

Governante ne’e hatutan, ró peskas sira dada-án tanba sira haré ró 15 ne’ebé maka ba halo peskas iha kosta sul ne’ebá tau bandeira RDTL.

Tuir Estanislau neneik ba neneik ró ilegál sira sei dada-án hotu, tanba ministériu mos ko’alia  ho konsellu ministrus, oinsá maka governu TL atu servisu hamutuk ho Indonézia, Austrália  atu sira bele ajuda hodi kontrola ró peskas ilegál sira ne’e.

“Ita mesak labele ba halo buat ida tanba ita nia ró atu ba halo operasaun ne’e kiik  no laiha kapasidade, ha’u  hanoin lakleur tan ita sei servisu hamutuk ho parte sira ha’u  dehan sei duni ses tiha ró peskas ilegál  sira,” ko’alia  Estanislau.

Nia informa  liu tan kona-ba  ró 15 governu kontratu ne’e oras dadaun sira hahú  ka’er  ona ikan maibé seidauk serteja ikan tonelada hira maka sira ka’er  ona, tanba ne’e hein de’it  lakleur tan ró 15 sei lori ikan sira ka’er  ne’e mai iha ne’e, hodi haré  tok hirak maka halo exportasaun no hirak maka sei fan iha rai laran. Atu halo exportasaun persija halo uluk lai inspesaun. (res)

Timor Post