Kustu Ba Apoiu Legál Sei Aas

DILI, (TATOLI) – Ministru Reforma Lejislativa no Asuntu Parlamentár, Fidelis Leite Magalhães, rekoñese kustu ba asisténsia téknika, liu-liu apoiu legál sei aas, tanba agora dadauk Timor-Leste sei uza lian portugés.

“Kustu ba asisténsia téknika ida ne’e problema ne’ebé mak Timor-Leste enfrenta alende problema seluk ne’ebé ita enfrenta ona, liu-liu iha apoiu legál. Ida ne’e estudu ida foin lalais identifika”, tenik iha debate espesialidade Orsamentu Jerál Estadu (OJE) 2018 ba loron daruak iha plenária segunda (3/9).

Nia dehan kustu ba prestasaun servisu tékniku hanesan apoiu legál sei karun, tanba Timor-Leste sei uza lian portugés no sistema ne’ebé mak aplika agora mai husi Portugal.

Governante ne’e mós dehan tan bainhira kompara Timor-Leste ho país seluk liu-liu iha problema legál ruma, kustu ba jurista karun.

Nune’e nia hatete maneira ne’ebé governu uza to’o agora kona-ba rekrutamentu asesór sira sei kontinua rekorre ba merkadu maibé kustu koko atu kontrola.

“Ida ne’e problema ne’ebé mak ita kontinua enfrenta, bainhira ita nia rekursu umanu iha prosesu hadi’a nia án atu sai di’ak liu tan“, katak.

Akresenta tan ida ne’e preokupasaun ne’ebé governante sira tenke haree, tuir orientasaun xefe governu atu haree rasionalizasaun da ne’ebé di’ak atu hetan valór ba osan ne’ebé gasta.

Jornalista: Julia Chatarina | Editora: Rita Almeida

Imajen: Ministru Reforma Lejizlativa no Asuntus Parlamentares Fidelis Manuel Leite Magalhães, durante diskusaun espesialidade Orsamentu Jerál Estadu 2018, iha uma fukun Parlamentu Nasionál. Imajen António Goncalves