PN AMEASA LORI AUTOR HAKEREK LIVRU RENETIL BA TRIBUNAL

DILI – deputadu sira iha uma fukun Parlamentu Nasional ameasa sei lori autor hakerek nain ba livru Renetil ho titlu “Sem Titlu Do Que Sem Patria” ho rajaun la los ou manipula istoria.

Tuir deputadu Eladio Faculto katak hanesan sidadaun ida kontinua respeita malu tanba nee nia fo hanoin atu hapara livru nee, maibe wainhira la hapara dalan ikus maka Tribunal tanba tuir nia kuandu la hadia istoria Timor Leste nian sei sai foer iha nia rain rasik.

Molok atu hakerek livru tenke hatene lolos istoria luta nian tanba nee ba ema neebe mak la kuinese Mau Hudu, bele dehan livru nee los tanba nee hau husu kuandu livru nee la hapara no hasi bebeik hau sei lori nia (Carlos da Silva Saki) ba tribunal,” hatete Deputadu Eladio liu hosi Plenaria iha uma fukun PN, Sigunda (8/06).

Iha fatin hanesan Deputadu Natalino do Santos husu ba Governu atu tau atensaun seriu ba livru nee hodi hadia.

Nunee mos ho deputadu Aurelio Ximenes husu ba se deit mak kuandu hakarak hakerek livru konaba istoria, tenke hakerek ho los nomos konfirma ba fundador nasaun nian ou luta nain sira neebe maka sei moris, atu nunee labele kria polemika istoria TL nian iha publiku nia let. Informasaun kompletu iha STL Jornal no STL Web, edisaun Tersa (9/6/2015). Thomas Sanches

Suara Timor Lorosae