MAUK MORUK HAKARAK RENDE IHA LORON FALINTIL

LAUTEM — Prezidente Repúblika (PR), Taur Matan Ruak, rona ona informasaun  katak Paulino Gama Mauk Moruk hakarak rende iha loron FALINTIL ne’ebé monu iha 20 Agustus tinan ne’e.

“Mauk Moruk dehan nia hakarak dia 20 de Agustus mak nia mai, ita hein,” informa Prezidente Repúblika bainhira hala’o diálogu ho komunidade sira iha suku Bauro, Postu Administrativu Lautem, Munísipiu  Lautem, Sesta (24/07).

Taur dehan, nia rasik maka mak hakarak simu Mauk Moruk bainhira hakarak rende.  “Ha’u mak simu nia (Mauk Moruk) maibé  forsa sei la retira,” afirma Taur.

Krime ne’ebé Mauk Moruk ho nia grupu halo ona nia fatin maka iha tribunál. Tanba, só tribunál maka hatuur lia loos ba ema hotu iha nasaun ne’e. Tanba ne’e, Mauk Moruk iha direitu atu defende aan iha tribunál.

Maske nune’e, Taur afirma, bainhira Mauk Moruk ho nia gurupu seidauk rende maka forsa estadu nian kontinua halo operasaun, tanba ne’e desizaun estadu nian.

Entretantu Xefe Estadu, haktuir, eis Komadante rejiaun tres (III), Cornelio Gama “L-7” no Prezidente partidu Trabalista, Ângela  Freitas hasoru malu ho nia lori lia tatoli Mauk Moruk nian katak retira forsa mak Mauk Moruk bele entrega-án.

Tanba ne’e Xefe Estadu hatan, forsa sei la sai hosi fatin prioridade ba operasaun iha postu administrativu Laga no Baguia munísipiu  Baucau too Mauk Moruk rende. (dgx)

Timor Post