XEFI SUCO TAPO/MEMO LAMENTA SERVISU BESIK

Reportajen: João Mauleto

Maliana - Xefi Suco Tapo/Memo, Postu Administrativu Maliana, Municipiu Bobonaro, lamenta tebes ho servisu ONG BESIK/RWSSP iha Tapo/Memo. Tamba durante tinan barak nia laran komunidade iha suku laran sempre lamenta ba Governo kona-bá kanalisaun bee-mos ba fatin sede suku. Xefi suku Tapo/Memo, Gaspar de Jesus Conceição informa ba STL iha nia knar fatin, Segunda (20/7/2015).

Tuir Gaspar katak, tamba bee-mos la iha nian nudar xefi suku sempre selu ema komunidade lalin bee-mos hodi ense tanki haris fatin. Servisu BESIK/RWSSP liu hosi kompaña Nalo Bul Lda atinji ona objectivo. Tamba, torneira 41 mak fornese ona bee-mos ba komunidade Tapo/Memo mak durante nee halerik bee-mos, la buka ona bee iha fatin. Maibe bee-mos nee prioridade deit ba komunidade ba fatin publiku ho igreja la liga nee duni la hetan bee-mos.

Tuir Gaspar katak, antes tekniku sira hahu instalasaun pipa husi bee matan Boltama area Pipgalak-II, nia sempre hatete ba BESIK/RWSSP no kompaña Nalu Bul Lda, atu instala mos torneira balu la fatin sede suco, eskola no igreja. Maibe, realidade hatudu, projecto nee remata la iha torneira ida mak instala ba fatin publiko sira nee.

Parte seluk, Gaspar mos hatete, Kompaña Nalo Bul Lda mak responsabilidade ba projecto kanalizasaun bee-mos komunidade nee maibe la iha Papan Nama. Tamba nee, nia rasik lahatene, osan hirak mak gasta ba projecto sistema kanalizasaun bee-mos ba komunidade Tapo/Memo, katak Gaspar.

Adelino dos Santos, nudar komunidade Tapo/Memo hatete, kanalizasaun bee-mos importante ba komunidade, maibe fatin publiku hirak mak ejiste iha Tapo/Memo mos importante. Tamba nee, presija halo kanalizasaun torneira balu ba fatin publiku hira iha Tapo/Memo, atu nune’e bele fasilita komunidade. Tamba ne’e, nia husu ba BESIK/RWSSP instala pipa, tau torneira iha fatin publiku tolu ne’e, komunidade mak uza hanesan torneira iha komunidade nia leet, dehan Adelino.   

Suara Timor Lorosa’e, Loron Sesta, 24 Jullu 2015