DEPUTADU MANUEL CASTRO: “EMPREZÁRIUS LABELE INVENTA BOQ”

Membru Komisaun E Parlamentu Nasionál (PN), ne’ebé trata ba asuntu Infra-Estrutura Transportes no Komunikasaun, deputadu Manuel Castro husu ba emprezáriu sira ne’ebé manan tender hodi halo Estrada, labele inventa BOQ arviru, tanba bele fó impaktu ba dezpezas orsamentu ne’ebé boot.

“Ezemplu dirasaun parte Delta ninia. Manila bo’ot sira ne’e serve atu ba bee dalan, la’os atu ba harii fali iha ne’ebá, ita haree oin seluk teb-tebes. Ne’e tanba saida? La’os katak ekipamentus ruma atu tau iha ne’ebé laiha ne’eduni aumenta sasan sira ne’e para depois hodi bele hetan ou aumenta osan. Ha’u hanoin buat ne’e ladun di’ak”, hateten deputadu Manuel Castro iha Parlamentu Nasionál foin lalais ne’e.

Reprezentante povu ne’e husu ba Sekretaria Estadu Asuntu Parlamentar, atu hato’o ba Ministru Óbras Públika (MOP) para bele haree didi’ak, liu-liu ba emprezáriu sira ne’ebé mak halo estradas, labele inventa BOQ nar-naran deit, hodi hamosu tan orsamentu bo-bo’ot.

Manuel Castro hatutan katak, kompañia sira sé bele karik servisu tuir dezeñu BOQ ne’ebé maka iha, tanba tau ekipamentu sira iha ne’ebá haree katak la merese duni tau iha ne’ebá.

Iha okaziaun ne’e Deputadu Manuel Castro mós kestiona konaba estrada ba parte Venilale ninia. Tanba tuir Manuel Castro, kompania ne’ebé maka uluk kaer projetu estrada ne’e promote ona atu fui alktraun, maibé iha realidade to’o oras ne’e kompañia husik abandona estrada ne’e noa lakontinua.

“Ha’u rona katak kompañia ne’e bangkrut tiha ona, maibé Governu hasai osan lubuk ida ba iha ne’ebá. Besik 10 milloenes de dolares amerikanus. Ne’ebé presiza relatóriu ida mai iha ne’e para ami hakarak atu hatene kona ba ida ne’e,”dehan nia.

Deputadu bankada FRETILIN ne’e akresenta mós katak, iha parte Vemase, kompañia sira kee fali ona alkatraun sira uluk taka ne’e, maibé lahatene bainhira maka atu bele hadia fila fali.

“Ne’ebé husu ba VI Governu konstitusionál ne’e, ita hakarak haree ninia rezultadu labele ita troka Governu tun sa’e deit, maibé nia implementasaun ne’e la la’o ba oin,”tenik nia.

Iha fatin hanesan Sekretariu Komisaun E PN ne’ebé trata asuntu Infra-Estrutura Transporte Komunikasaun deputadu Paulino Monteiro Soares Babo hateten katak, kompañia sira ne’ebé maka hakarak kaer projetu ba estrada tenki kumpri rekezitus ne’ebé maka iha.

“Projetu ida ne’ebé maka ita hakarak haree ba nia kualidade, rekezitus barak teb-tebes, kritérias barak maka ita tenki kumpri, ne’e kompañia tenki esperénsia, kompañia tenki iha osan, kompañia ne’e tenki administrativamente nia tenki di’ak, nia mentalidade tenki di’ak para hala’o buat ne’e ho di’ak,” nia esplika.

Hatán ba preokupasaun deputadu sira nian ne’e, Sekretaria Estadu Asuntu Parlamentar Maria Teresinha Viegas hateten katak, nia parte sei hato’o problema ne’e ba Governu liu husi Ministériu ne’ebé kompetente atu tau iha konsiderasaun.eni

Jornal Nacional