HARE TONELADAS 300 AT IHA ARMAJEN

Hare toneladas 300 resin ne’ebé mak Governu sosa husi povu iha tinan 2009, to’o agora sei rai nafatin iha aramjen Bebora, no hare sira ladi’ak ona.

Primeiru Ministru (PM) Rui Maria de Araújo deskobre failansu ida ne’e, bainhira halo inspesaun ba armazen Bebora hodi haree produtus ne’ebé durante ne’e Governu gasta osan hodi sosa husi povu.

“Ita ohin haree tiha ona armazen ida iha Bebora, armazen ne’e, tau produtu lokal sira iha ne’eba, hanesan hare, maibé iha haree balu ke sosa ona husi 2009, se tau iha ne’eba hela, depois ita ba haree tiha ona mós armazen ka fatin ida ne’ebé dulas haree, dulas hare ne’e setór privadu sira nian, maibé oinsa servisu hamutuk ho Estadu atu dulas hare sira ne’e,” dehan PM Rui Araújo ba jornalista sira hafoin halo tiha inspesaun ba aramazen refere, Sesta (18/9).

Xefi Governu ne’e dehan, hare ne’ebé mak Governu sosa ona iha tinan 2009 ne’e, 300 etal toneladas, maibé haree sira ne’e atu sai at hotu ona.

Tanba ne’e, Rui Araújo husu ba Ministru Komersiu Industria atu halo jestaun di’ak liu tan ba produtu sira ne’ebé Governu sosa ona husi povu, tanba hahú kedas iha tinan 2008, kada tinan Estadu gasta osan barak para sosa produtu lokal sira ne’e.

Rui Araújo dehan,nia sei lembra iha IV Governu konstitusional, hamosu programa ida ne’ebé hanaran, povu kuda Governu sosa, maibé iha tinan 2009 Governu sosa tiha hare toneladas lubuk boot ida, to’o agora sei tau nafatin iha armazen.

“Ida ne’e persija dinamija jestaun ida ne’e, halo efisiente liu tan, sela’e ita estraga hela de’it,”afirma Rui Araújo.

Nia dehan, vizita surpreza ne’e, ne’ebé nia halo ba Ministériu do Komersiu Industria i Ambiente ninia áreas traballu balu, ida mak inspesaun ekonomíka alimentar, ne’ebé iha relasaun ho konsumedores sira ninia direitus.

Nia afirma, vizita ida ne’e, atu haree oinsa Estadu kria kondisoens atu proteje consumedor sira nia direitu.

Xefi Governu ne’e haktuir, inspesaun ne’e li-liu atu haree, oinsa inspetores sira halo inspesaun ba dasin ne’e lolos kona-ba bomba gazolina sira, atu hatene lolos katak, litru ne’e los duni ka la’e.

“Depois oinsa halo inspesaun ba loja sira ne’ebé fa an sasan, atu haree sasan sira nia kualidade ne’e halo nusa, ninia prazu se di’ak ka la’e, tanba kuadru legal ka leis ne’e, iha hotu ona para, komersiante sira ne’ebé la kumpri kritéria sira ne’e, inspetores sira bele liu husi prosesu ida, foti desizaun atu sira tenke selu multa ka labele selu,”katak Rui Araújo.

Nia haktuir, área seluk ne’ebé persija Ministériu Komersiu Industria persija halo servisu maka’as, mak oinsa sosa tiha produtu sira ne’e, lori mai tau iha armazen no distribui fali hanesan foos.

Nia dehan, hare sira ne’ebé mak dulas tiha ona, Governu foti hodi ba tau hamutuk iha aramzen, tanba haree ne’ebé mak Governu sosa tiha ona husi populasaun, labele husik de’it iha aramazen.

“Ita buka intende oitoan, husi hare sira ne’ebé ita hola ne’e, dulas tiha ba foos, foos ne’e ita halo saida ho ida ne’e. ita dulas tiha ba foos, depois ita faan ba merkadu, iha situasaun ne’ebé foos nia presu sa’e maka’as,”relata Rui Araújo.

Nia haktuir, Governu iha aspeitu rua, ida mak, Governu sosa foos husi estranjeiru, ida sosa husi povu rasik, aspeitu rua ne’e, hanesan lalehan no rai.cos

Jornal Nacional