REVIZAUN LEI VITALÍSIA, ESBOSU CNRT IHA PROSESU ELABORASAUN

Deputadu bankada CNT, Cesar Valente ‘Pilotu’ hatete bankada CNRT iha ona prosesu elaborasaun ba esbosu lei pensaun vitalisia nebe atu halo revizasaun.

Nia hatutan esbosu bankada CNRT nian nee iha ona Sekretario Jeral Partido CNRT nian hodi entrega ba meza parlamento Nasional.

Polítika bankada parlamentar sira nian ne’ebé maka hakarak atu halo revizaun ba lei pensaun vitalísia maioria iha ona vontade diak, tantu partidu bloku koligasaun (CNRT, PD no Frente Mudansa) inklui bankada opozisaun FRETILIN rasik.

Deputadu Pilotu pessoalmente konkorda duni atu halo revizaun ba lei pensaun vitalísia ne’ebé maka oras ne’e sai diskusaun bo’ot iha públiku. Maibe nia fiar katak lei refere sei halo revizaun, tanba polítika konsensu nasionál entre bankada parlamentar sira iha ona.

“Agora hela deit ajusta entre CNRT aprezenta nia lei para ho FRETILIN, PD no Frente-Mudansa hanoin lisuk oinsa maka bele ajusta sira nia proposta ne’ebé maka sira hato’o tiha ona. Sekretariu Jerál partidu CNRT nian kontaktu ona ami deputadu sira husu opiniaun no ami CNRT tenke konsistente ho ninia programa iha kampaña liu ba katak tenke revee duni pensaun vitalísia ne’e, bele redus hodi fó justisa social ba sidadaun hotu,”deklara deputadu Pilotu ba Jornalistas sira semana kotuk ne’e iha PN.

Pilotu hatutan, durante ne’e husi bankada PD aprezenta ona sira nia proposta no propriu bankada FRETILIN iha II Lejislatura hato’o ona sira nia proposta no FRETILIN husu atu review fila fali proposta lei ne’e.

“No agora dadauk bankada sira hotu hein deit proposta hosi bankada CNRT nian hatama para hodi haree. No ha’u fiar katak Sekretariu Jerál CNRT nian elabora hela esbosu ida kona-ba revizaun lei ne’e,”afirma nia.

Nune’e, deputadu Pilotu mós husu ba Prezidente Parlamentu Nasionál, Vicente Guterres atu hola parte maka’as mós iha desizaun sira ne’e para hodi deskute.

“Ami sei ezijé nafatin para bankada bele haree husi partidu ninia proposta ne’e hodi bele aprezenta no molok tama ba kampaña eleitoral iha tinan 2017 pelu menus lei pensaun vitalísia ne’e iha ona revizaun,”dehan Pilotu. bal

Jornal Nacional