DISKUTI FRONTEIRA TASI, CDF BUKA ESTRATEJIA FOUN HASORU AUSTRALIA

Lideransa jerasaun tuan ho jerasaun foun sira ne’ebé hamutuk iha Comissão Delimitação de Fronteiras (CDF), Tersa (14/9), diskuti hamutuk hodi buka estratejia foun hasoru Australia kona ba fronteira tasi entre Australia ho Timor-Leste (TL) ne’ebé iha hela problema nia laran.

Lideransa jerasaun tuan no foun sira ne’ebé partisipa iha enkontru ne’e mak, Ministru Planeamentu Investimentu Estratejiku, Kay Rala Xanana Gusmão, Mari Alkatiri, Ramos Horta, Francisco Guterres ‘Lu-Olo’, no Jerasaun foun sira mak hanesan, Primeiru Ministru Rui Maria de Araújo, Ministru Prezidensia Konsellu Ministrus, Agio Perreira, Ministru Negosius Estranjeirus no Kooperasaun, Hernani Coelho, no Ministru ESTATAL, Dionisio Babo.

“Reuniaun ida ne’e, haree no analiza situasaun kona-ba peritus sira ne’ebé mai ko’alia ne’e, maibé detallas ami labele ko’alia, tanba ida ne’e intrese Estadu nian,”informa Portavoz Governu Agio Perreira ba jornalista sira iha Ministériu Negosius Estranjeirus i Kooperasaun (MNEK), hafoin enkontru ne’e remata, Segunda (14/9).

Nia hatutan, iha enkontru ne’e, lideransa jerasaun tuan ho jerasaun foun sira ko’alia kona-ba opiniaun legal de’it.

“Asuntu sira ne’ebé ami ko’alia ohin ne’e, ami labele ko’alia sai, sela’e problema bo’ot,”katak Agio Perreira.

Hatan kona-ba iha fulan ida ne’e nia laran, Timor Leste atu hato’o tan pozisaun balu ba Holanda, Agio Perreira dehan, ida ne’e mós nia labele fó sai lai. “Kuandu atu hato’o ona mak, ami hato’o ba imi,”dehan Agio Perreira.

Lideransa sira ne’e, diskuti intrese Estadu nian, relasiona ho foin lalais Espesialista lei maritime Vaughan Lowe mai vizita Timor Leste hodi fó hanoin ba Estadu Timor-Leste tenke kuidadu ho Australia, bainhira halo negosiasaun kona-ba frontreira tasi entre rai rua.

“Frontreira marítima ne’e komplikadu, tanba liña klaran (median line), dala barak halo negosiasaun maibé la susesu, maibé justisa mak sei haree, saida mak loos, saida mak sala, tanba sa mak ita la dezeña marka liña klaran ba frontreira marítima iha mundu tomak, ita tenke halo negosiasaun ho kuidadu,” dehan Voughan Lowe hodi husu ba Estadu Timor Leste atu toma kuidadu.

Voughan Lowe husu ba Estadu Timor Leste atu kuidadu, tanba nia mak agora dadauk Advogadu principal Timor Leste nian hasoru Austrália iha tribunal Olanda.

Advogadu Prinsipal Timor-Leste ne’ebé koñese mos lei tasi nian mak hanesan Elihli Lauterpache (85) ho nia delegasaun, Michael Woor no Prof. Vaughan Lowee ho ekipa lidera husi Ajente Estadu ba lasu iha Corte Internasionál iha Den Haag, Olanda, Joaquim da Fonseca no Embaixadór Timor-Leste ba Belgia, Nelson Santos.

Lowe rekoñese Timor-Leste laiha koñesementu klean kona-ba lei tasi nian, maibé presiza uza assessor ne’ebé kualifikadu hodi defende Timor-Leste.

Tuir Voughan Lowe katak, esperiensia ne’ebé nia iha, nasaun ne’ebé riku ba mina no gas sempre iha dezafius.

“Timor-Leste bele laiha peritus, laiha koñesementu, maibé ita tenke emprega ka fó servisu ba ema ida hodi hala’o servisu, Estadu tenke uza asessor ne’ebé di’ak hodi define estratéjiku kona-ba ita nia direitu kona-ba frontreira marírima, tanba buat hotu tenke la’o ho justisa,”dehan Voughan Lowe.

Maibé, Voughan Lowe dehan, nia sai ona Advogadu ba TL rekoñese, kestaun frontreira marítima presiza lori tempu, labele hanoin kestaun ne’e atu hetan solusaun fasíl liu.

Voughan Lowe mós fahe ona esperensia kona-ba disputas frontreira marírima iha mundu tomak nian, hanesan, Japaun, Nikaragua, Peru, no Palestina iha tribunál arbitrazen internasionál.Maibé Lowe rekoñese lori nasaun balun sai susesu no balun to’o oras ne’e seidauk hetan solusaun, hanesan rai Palestina nian.

Nia esplika,   rai ida atu hetan ninia soberania tasi nian, labele para atu luta, maibé tenke buka meius oi-oin no esperiensia husi nasaun hirak ne’ebé infrenta problema hanesan.cos

Jornal Nacional