Indonézia sei haforsa lei antiterrorista hafoin atendadu iha Jakarta

Indonézia sei haforsa nia lei antiterrorista no tau  poder liu ba polísia atu kaer suspeitu ne’ebé halo planu ba atentadu sira, hafoin atake iha Jakarta, ne’ebé maka halo ema nain ualu mate, informa  iha ohin hosi  imprensa lokál. 

Desizaun ne’e foti iha  reuniaun entre Prezidente indonéziu, Joko Widodo, reprezentante hosi formasaun ne’ebé iha asentu parlamentar no ajénsia seguransa sira.

Iha revizaun ba atuál lejislasaun, ne’ebé aprova iha 2006, hakarak impede atu ema  indonéziu labele halo viajen ba estranjeiru hodi hamutuk ho grupu kombatente   hanesan Estadu Izlámiku (EI) no akuza sira ne’ebé  treinu paramilitar ho organizasaun ne’e.

Portavós prezidensiál, Zulkifli Hasan, hatete katak revizaun ne’e atu supera  obstákulu legál sira hodi entrega ba polísia atu evita  hahalok terrorizmu no propagasaun propaganda radikál, tuir diáriu The Jakarta Globe.

Autoridade sira estima katak besik ema  indonésiu 500 viajen tiha ona ba Síria no Irake hodi hamotuk ho Estadu Izlámiku, ne’ebé maka atus ida liu fila ona mai nasaun aziátiku.

SAPO TL ho Lusa