Nasaun Unidu hakarak manuál eskolár sira baratu liu

Organizasaun Nasaun Unidu nian ba Edukasaun, Siénsia ho Kultura (UNESCO) defende ona iha loron-tersa ne'e redusaun ba folin hosi manuál eskola sira nian hodi permiti atu iha tan alunu sira iha mundu tomak ne'ebé bele hetan livru sira.

Iha relatóriu ida ho títulu “Every Child Should Have a Textbook”, autoria hosi Global Education Monitoring Report, defende ona katak sentraliza iha nível nasionál merkadu hosi livru sira bele hamenus folin ba euro 2,7 iha manuál ida-idak no permiti poupansa ida liu euro millaun 900 tinan-tinan bainhira sosa materiál eskola nian iha de'it Áfrika subsarianu.

Modelu finanseiru di'ak ida bele tulun aumenta maka'as númeru hosi livru sira ne'ebé disponivel ba labarik sira iha mundu tomak, kontribui hodi hadi'a rezultadu eskolár sira - liuliu iha nasaun kiak sira - no bele aumenta nível sira literasia nian entre 05 no 20%.

Inkéritu ida hala'o iha eskola primáriu sira iha nasaun 11 iha dezenvolvimentu (Arjentina, Brazil, Xile, Índia, Malázia, Paraguai, Peru, Filipina, Sri Langka, Tunízia no Uruguai) hatudu katak, iha média, to'o 20% alunu sira iha tinan dahaat laiha manuál sira ka tenki fahe. Iha Kamaraun, iha de'it livru ida leitura nian ba alunu na'in 12 no matemátika ida ba alunu na'in 14 iha tinan daruak eskolaridade nian.

Laiha investimentu hosi Governu sira

Institutu estatísitiku hosi UNESCO (UIS) konklui mós katak governu sira la investe maka'as iha manuál sira, fó sai katak iha 2012, nasaun 36 gasta de'it 2% hosi nia orsamentu ba edukasaun primáriu iha materiál eskolár sira, nune'e tuir UNESCO, harii obstákulu foun sira ba aprendizajen ba ema kiak sira.

Tanba ne'e, dokumentu rekomenda katak, pelumenus, 03 to'o 05% hosi orsamentu destinadu ba ensinu báziku tenki gasta iha manuál sira, aumenta folin ne'e ba 06 to'o 08% bainhira hanesan ensinu sekundáriu.

Relatóriu rekomenda katak iha Global Book Fund oinmai, propostu hosi nasaun doadór oioin, aumenta rekursu sira ba manuál eskolár sira no tuir doasaun sira iha setór privadu, argumenta katak ne'e bele aumenta finansiamentu hosi livru sira iha Áfrika subsarianu hosi dolár millaun 549 ba millaun 785, ne'ebé bele aumenta maka'as ba númeru manuál sira ne'ebé disponivel iha rejiaun.

SAPO TL ho Lusa