GOVERNU HALO AVALIASAUN BA SAHAM TT

Primeiru Ministru (PM), Rui Maria de Araújo informa katak, agora dada’uk Governu forma ona ekipa ida hodi halo estudu avaliasaun ida ba saham Timor Telecom (TT), hodi Estadu bele foti desizaun kona-ba sosa TT.

PM Rui Maria de Araújo informa katak, buat ne’ebé mak Konsellu Ministru deside tiha ona ne’e, la’os atu sosa ona Timor Telecom, maibé atu halo avaliasaun ba saham ka sosiu atu fa’an ne’e.

Xefe Governu ne’e esklarese, agora dada’uk Governu forma ekipa ida, atu halo avaliasaun ba balores husi saham ne’ebé fa’an ne’e, para haree katak, bale apena atu sosa duni ka la’e.

“Ida ne’e para depois Governu foti desizaun katak, sosa duni ka la sosa,” informa Rui Maria de Araújo ba jornalista sira iha Palacio Prezidensial Aitarak Laran Dili, Kinta (10/03), hafoin hasoru malu ho Prezidente Repúblika Taur Matan Ruak.

Rui Ataújo dehan, desizaun ne’ebé Konsellu Ministru foti tiha ona ne’e, hanaran desizaun deliberasaun, entaun deliberasaun ne’e la persija hasai iha dekreitu.

“Deliberasaun ne’e, ita rejista iha akta reuniaun ninian, no sai hanesan desizaun formal ida, i ekipa ne’ebé forma tiha ona ne’e, depois Vice Ministru Finansa mak sei lidera ekipa ne’e, hamutuk ho Vice Ministru Obras Públikas Transportes i Komunikasaun,” esplika Rui Araújo.

Nia dehan, Helder Lopez ho Inacio Morreira mak sei eskolha teknikus balu, hodi halo avaliasaun ba proposta atu fa’an ne’e, li-liu atu haree didi’ak nia valor ne’e oinsa.

“Se valor saham sira ne’e di’ak duni, depois ita persija hola desizaun, ita avansa ka la’e, nemak ita foin negosia presu,” relata Rui Araújo.cos

Jornal Nacional