Sei kanoniza Madre Teresa iha loron 04 Setembru

Iha loron-tersa ne'e papa Francisco asina ona dekretu kanonizasaun ba Madre Teresa Calcutá, figura koñesidu iha mundu tomak tanba asaun karidade iha Índia, fó sai hosi Vatikanu.

Serimónia kanonizasaun nian sei hala'o iha loron 04 Setembru.

Desizaun ne'e foti iha asembleia ne'ebé halo ezame ba kauza relijiozu, ne'ebé mate iha tinan 1997 no simu beatifikasaun iha tinan 2003.

"Santa Ema Ki'ak nian", hanesan naran ne'ebé ema koñese nia tanba nia serbisu iha Calcutá, mate iha tinan 1997, ho tinan 87. Seidauk fó sai kona-bá serimónia sei halo iha Roma ka iha Índia.

Freira albaneza ne'ebé hetan prémiu Nobel dedika nia moris ba ema sira ne'ebé kiak liu no sei sai Santa hosi Igreja Katólika hafoin aprovasaun hosi papa Francisco, ne'ebé rekoñese ona kura ne'ebé mane ida simu ba nia moras tumór kakutak nian.

Prova hosi sasin sira durante prosesu estudu ba kazu refere katak ema sira ne'ebé besik ema moras ne'e reza maka'as ba Madre Teresa, tanba mane ne'e nia feen iha devosaun maka'as ba Madre Teresa.

Aleinde Madre Teresa, asina mós iha loron-tersa ne'e dekretu ba kanonizasaun hosi Estanislau de Jesus Maria da Polónia (1631-1701), fundadór hosi Kongregasaun Mariano hosi Imaculada Conceição da Beatíssima Virgem Maria; José Sánchez del Río, mexikanu (1913-1928), martir ho tinan 14 durante perseguisaun relijiozu iha Méxiku; José Gabriel del Rosario Brochero (1840-1914), ne'ebé koñesidu ho naran ‘Cura Brochero’ ne'ebé la'o iha Arjentina ho kuda-buru ida hodi lori mensajen Evanjellu nian iha sékulu XIX; sueka Maria Elisabeth Hesselblad (1870-1957), fundadora hosi Orden Santíssimo Salvador de Santa Brígida.

Lusa/Renascença em SAPO TL