Proposta Nomeasaun no Exonerasaun Polémika entre Prezidente da Repúblika ho Governu RDTL

Fundasaun Mahein (FM), 23 Fevereiru 2016

Komunikadu Imprensa

Liu husi Mahein Nia Lian Nú 108 (Versaun Tetum.pdf) kona-bá Polémika ne’ebé dadaun ne’e espalla iha públiku kona-bá nomeasaun no exonerasaun ba kargu Chefe Estado Maior General das Força Armada (CEMGFA) F-FDTL no Vice-Chefe Estado Maior General Força Armada (Vice-CEMGFA) F-FDTL nian. To’o agora públiku kontinua dúvida ho interpretasaun oin-oin no espalla mos rumoris oin-oin. Nune’e mos nomeasaun no exonerasaun ba CEMGFA (F-FDTL) no Vice-CEMGFA (F-FDTL) hetan protestu maka’as husi membru Parlamentu Nasional no Governu rasik sei dúvida ho ninia konstituisionalidade no legalidade.

Relasiona ho polémika nomeasaun no exonerasaun ba CEMGFA (F-FDTL) no Vice-CEMGFA (F-FDTL), to’o agora husi parte rua, Governu mantein proposta renovasaun ba kargu CEMGFA (F-FDTL) no Vice-CEMGFA (F-FDTL). Nune’e mos Prezidente da Repúblika mantein desizaun exonerasaun ho promosaun no nomeasaun foun ho promosaun.

Haree ba situasaun Forsa Armada nian (F-FDTL), funsaun CEMGFA, Vice-CEMGFA no Chefe Estado Maior Força Armada (CEMFA) F-FDTL dadaun ne’e iha situasaun “interinidade”. Prezidente da Repúblika nu’udar Komandante Supremu Forsa Armada nian tenki foti desizaun ne’ebé bele garante funsionamentu instituisaun Forsa Armada (F-FDTL). Portantu mandatu CEMGFA, Vice-CEMGFA no CEMFA (F-FDTL) ramata ona iha loron 6 Outobru 2015.

Antes ne’e Governu halo ona proposta nomeasaun no iha termus proposta ne’ebé Governu aprezenta atu halo renovasaun ba mandatu CEMGFA (F-FDTL) Major General Lere Anan Timur no Vice-CEMGFA (F-FDTL) Brigadeiro General Filomeno da Paixão de Jesus. Resposta husi Prezidente da Repúblika rezeita proposta Governu nian tanba proposta ne’e la kompletu no temi deit kargu CEMGFA (F-FDTL) no Vice-CEMGFA (F-FDTL), haluha tiha kargu CEMFA (F-FDTL) ninia mandatu tinan rua deit, ne’ebé ramata ona no labele halo renovasaun-tan. Iha ne’ebé mandatu CEMFA (F-FDTL) Koronel Falur Rate Laek ramata ona iha loron 6 Outobru 2015 ba periodu rua nian (6 Outobru 2011 to’o 6 Outobru 2013 no 7 Outobru 2013 to’o 6 Outobru 2015) ne’ebé lolos tenki halo nomeasaun foun. Konforme Artigu 75, no 2, Decreto Lei No 7/2014 Estatuto dos Militares das F-FDTL nia haruka.

Ba mandatu kargu CEMGFA (F-FDTL) Major General Lere Anan Timur no Vice-CEMGFA (F-FDTL) Brigadeiro General Filomeno da Paixão de Jesus, la signifika labele halo renovasaun. Maibe bele halo renovasaun ba mandatu ida-tan tanba foin asume mandatu dahuluk ba tinan haat. Tuir Dekretu Lei No 7/2014 Estatutu Militares das F-FDTL artigu 74 hatete mandatu ba kargu CEMGFA (F-FDTL) no Vice-CEMGFA (F-FDTL) masimu durasaun tinan haat no bele halo renovasaun ba dala ida deit. Iha ne’ebé asume hahu loron 6 Outobru 2011 no ramata iha loron 6 Outobru 2015.

Maske nune’e, proposta husi Governu la signifika Prezidente da Repúblika tenke simu tomak deit. Governu halo proposta, nomea no exonera ne’e kompetênsia Prezidente da Repúblika nian (haree Konstituisaun RDTL artigu 86 alinea m, Lei Organika F-FDTL artigu 8 no 9, Dekretu Lei No 7/2014 EM F-FDTL artigu 74).

Rekomendasaun

1. Rekomenda ba Prezidente da Repúblika no Governu presiza komunikasaun ne’ebé saudavel no klarefika ba públiku kona-bá polémika ne’ebé dadaun ne’e la’o hela, hodi labele kria rumoris oin-oin iha sosiedade nia leet. Tanba públiku dadaun ne’e sente tauk wainhira haree polémika ne’ebé liga ho militar sira.

2. Rekomenda ba Prezidente da Repúblika no Governu solusiona lalais polémika ida ne’e no ultra-pasa situasaun ne’ebé dadaun ne’e Forsa Armada ka F-FDTL hasoru hela. Nune’e instituisaun ne’e bele hetan fila fali ninia lideransa hodi garante funsionamentu instituisaun nian.

3. Rekomenda Prezidente da Repúblika, Parlamentu Nasional no Governu utiliza dalan legal hodi husu Tribunal Rekursu nia apresiasaun kona-bá desizaun ne’ebé Prezidente da Repúblika hasai. Duke resposta malu liu husi media hodi kria rumoris oin-oin iha sosiedade nia leet.

Atu hetan informasaun kle’an liu kona-bá asuntu ne’e bele kontaktu:

Nélson Belo
Diretor Ezekutivu Fundasaun Mahein
Email: direktor.mahein@gmail.com
Telemovel: (+670) 78316075 no 77561184
Website: www.fundasaunmahein.org

(Foto: Prezidensia Republika)