PR timoroan agradese apoiu hosi "belun sira" iha luta ba independénsia nasaun nian

Prezidente Repúblika timoroan agradese ona iha loron-sesta ne'e, iha aniversáriu ba dala 14 hosi restaurasaun independénsia nian, apoiu hosi "belun" barak, iha mundu tomak, ne'ebé sente "inspira ba dignidade" hosi povu Timor-Leste nian.

"Sentimentu hasoru violénsia ne'e, no luta hodi hetan respeitu ba ita nia dignidade nu'udar povu, komprende tiha ona hosi ema millaun resin. Luta hosi timoroan sira nian ba dame hetan mós belun sira no inspira ona solidariedade hosi ativista sira, iha mundu tomak", hatete hosi Taur Matan Ruak.

Iha diskursu iha Gleno, kapital hosi munisípiu Ermera, ne'ebé iha loron-sesta ne'e simu komemorasaun ofisial sira aniversáriu nian, Taur Matan Ruak entrega ona kondekorasaun sira ba sidadaun nasional no estranjeiru oioin ho Ordem de Timor-Leste.

Taur Matan Ruak hatete katak hanesan rekoñesimentu iha kondekoradu sira na'in 25 - hosi Timor-Leste, Mosambike, Portugal, Inglatera, Estadus Unidus, Indonézia ho Austrália - "belun oioin, solidáriu ho kauza liberdade hosi povu no distingidu hosi nia asaun".

Iha loron ida festa ne'ebé timoroan sira komemora "liberdade, nu'udar nasaun, no susesu sira" iha tinan 14 ikus ne'e, Taur Matan Ruak fó hanoin hikas sakrifísiu sira hosi luta hasoru okupasaun indonéziu.

"Timoroan sira tenki kaer arma sira maibé ami nia rezisténsia sira nafatin iha kombate ida ba dame, hasoru dalan oioin hosi violénsia nian", nia hatete.

Entre kondekoradu sira, xefe Estadu destaka ona eis-prezidente mosambikanu, Samora Machel, ne'ebé nia memória honra ho Grande Colar, kondekorasaun aas liu timoroan nian ba sidadaun estranjeiru.

"Samora Machel uluk hanesan kombatente ida ba dignidade, iha frente oioin: iha libertasaun hosi nia nasaun, iha solidariedade maka'as ho luta ba libertasaun ita nia povu, no iha liña oin hosi kombate hasoru 'Apartheid' no rasizmu", nia hatete.

"Tanba nia humanizmu, nia vivénsia solidariedade nian, memória hosi Mosambike nia oan-mane ne'e sai ona hanesan patrimóniu ida iha luta ba emansipasaun humanidade nian", nia hatete.

Xefe Estadu fó hanoin "kombatente liberdade seluk", eis-prezidente portugés Jorge Sampaio, ne'ebé nia sei entrega rasik kondekorasaun ne'ebé atribui ona iha tinan liubá.

"Bainhira, iha 1999, ami loke ami nia janela ba liberdade, iha prezidénsia no iha governu Portugal nian iha ativista sira liberdade nian, belun sira hosi kauza timoroan nian, hanesan Jorge Sampaio ho António Guterres ne'ebé fó ona serbisu importante sira ba Humanidade no ba dignidade timoroan sira nian", nia afirma.

Hosi Timor-Leste iha kondekoradu na'in hitu, inklui pároku oioin, liuliu italianu Locatelli, padre timoroan Leão, no luzu-timoroan sira João Felgueiras ho José Martins, "edukadór sira ne'ebé la kolen hodi halo susesu maka'as ba jerasaun timoroan sira no iha prezervasaun ba ita nia identidade nasional no promosaun ba dezenvolvimentu kultural nasaun nian".

Entre ema portugés sira ne'ebé kondekoradu, Taur Matan Ruak destaka ona visi-almirante António Silva Ribeiro - ne'ebé tulun ona "hodi hetan ekipamentu sira komunikasaun sira nian, durante okupasaun, hodi Falintil sira uza iha foho" - no kantór Luís Represas, ne'ebé nia knananuk kona-bá Timor "hamosu ona apelu estraordináriu ida" no "hakilar ida alarme nian ne'ebé hamosu apoiu emosional hosi portugés millaun resin iha tempu emerjénsia nasional" Timor-Leste nian.

Xefe Estadu kondekora mós atuál sekretáriu ezekutivu CPLP nian, Murade Murargy, no personalidade na'in hitu no organizasaun sira hosi Austrália, hotu ho "istória naruk hosi solidariedade nian ho timoroan sira" iha momentu sira komplikadu nian.

"Povu australianu simu ho liman nakloke ami nia refujiadu sira, rekolla fundu sora ba rezisténsia, bolu atensaun ba ami nia luta, kaer metin valór desénsia no humanidade nian iha relasaun internasional sira, iha tinan sira ne'ebé Timor-Leste moris hosi todan okupasaun no funu nian", nia hatete.

Destake espesial ba Kevin Sherlock, kondekoradu ho títulu póstumo (hafoin nia mate), ne'ebé uluk hanesan responsável ba arkivu privadu boot ida kona-bá Timor-Leste.

"Kevin nia domin ba ita nia kultura ho ita nia realidade tenki sai hanesan banati ba ita rasik, timoroan sira, tanba hatudu mai ita importánsia hosi memória iha prezervasaun no transmisaun ba valor no tradisaun sira, no hosi akontesimentu sira, ne'ebé iha kazu barak, kontribui ona hodi ohin loron ita sai nu'udar nasaun independente ida", nia hatete.

Iha tinan ne'e simu mós kondekorasaun, ne'ebé fó ona iha tinan ida liubá, eis-primeira-dama timoroan, australiana Kyrsty Gusmão ne'ebé, "aprende ona hadomi Timor no kontribui ona ba liberdade, antes no hafoin Restaurasaun Independénsia nian".

SAPO TL ho Lusa – Foto: EPA@ António Dasiparu