Prezidente
Repúblika timoroan apela ona iha loron-sesta ne'e ba Austrália hodi rona
"pedidu lejítimu no natural" hosi Timor-Leste no aseita hodi hahú
diálogu sira kona-bá fronteira tasi nian, hodi labele husik asuntu ne'e afeta
relasaun bilateral.
"Negosiasaun
ida hanesan ne'e lori tempu. Maibé nasaun sira ne'ebé respeita malu no kopera
hamutuk tenki hatudu vontade hodi fó lalais hakat nesesáriu sira hodi bele
estimula prosesu ne'e no kontribui hodi hametin relasaun bilateral sira iha
prezente no iha futuru", Taur Matan Ruak hatete.
"Povu
timoroan hein ho espetativu asaun pozitivu sira hosi parte governu Austrália
nian", nia hatete ho hatudu fiar iha asaun hosi Xanana Gusmão ne'ebé
nomeadu nu'udar negosiador prinsipal hosi Timor-Leste iha tema ne'e.
Xefe
Estadu, ne'ebé ko'alia iha Gleno, iha súl Díli nian, iha serimónia sira ba
tinan 14 restaurasaun independénsia Timor-Leste nian, fó hanoin koperasaun
bilateral maka'as ne'ebé iha ho Austrália, maski "asuntu sira kona-bá
definisaun hosi fronteira sira tasi nian seidauk rezolve ida" entre nasaun
rua ne'e.
"Ami
la permiti atu kestaun hosi fronteira kontinua adia nafatin no afeta relasaun
sira ne'ebé ita nia povu sira dezenvolve tiha ona hahú hosi kombate komun iha
Funu Mundial Daruak no, hafoin ne'e, iha momentu sira seluk ne'ebé importante
iha tinan 70 ikus ne'e", nia konsidera.
"Konsolidasaun
hosi Estadu Timor-Leste nian hanesan aspirasaun lejítimu ida, ne'ebé komprende
hosi komunidade internasional. Delimitasaun ba fronteira sira hanesan
importante iha prosesu ne'e no apoia iha direitu no asaun di'ak sira hosi
komunidade nasaun sira nian", nia hatete.
Nia
konsidera ona katak aspirasaun ida ne'ebé australianu sira hatene, "inklui
hosi órgaun sira soberania no hosi sosiedade sivil Austrália nian".
Iha
nia diskursu Taur Matan Ruak rekoñese ona progresu sira ne'ebé hetan iha
Timor-Leste iha tinan 14 ikus ne'e, hametin nia instituisaun sira, promove
rekonsiliasaun internu no esternu no konsege mantén estabilidade iha nasaun.
Nia
hatete katak liberdade imprensa, protesaun judisial ba sidadaun sira no garanti
sira seluk ba direitu ema sira nian hanesan motivu sira ne'ebé timoroan sira
tenki senti orgullu.
"Timoroan
sira iha razaun hodi senti orgullu ba asaun sira ne'ebé hala'o hela iha tinan
14 dahuluk sira independénsia nian", nia afirma no felisita apoiu hosi
parseiru internasional sira, "importante ba susesu sira ne'ebé hetan
ona".
Nia
hatete, ohin loron Timor-Leste fó fila fali apoiu sira ne'e, ho intervensaun
internasional ida, hametin integrasaun rejional, inklui ho viziñu sira
Indonézia ho Austrália.
"Prosesu
dame no rekonsiliasaun nian hamosu ona relasaun foun sira ba viziñu di'ak no
amizade ho Indonézia no ohin loron nasaun rua ne'e iha koperasaun bilateral no
multilateral ida ne'ebé di'ak tebes no pozitivu, ne'ebé iha vantajen maka'as no
promove nafatin aumentu ba kontaktu família sira nian, kultura no ekonómiku
entre timoroan sira no indonéziu sira", nia hatete.
Relasaun
di'ak sira permiti ona, iha aspetu sira seluk, identifika timoroan sira ne'ebé
lori ona ba Indonézia durante okupasaun, nia hatete.
Timor-Leste
hametin nafatin nia relasaun sira iha ASEAN, mantén relasaun forte sira ho
nasaun oioin iha kontinente oioin, ho parseiru sira hanesan Portugal, ne'ebé
"oferese nafatin asisténsia ida no konfiansa ba esforsu dezenvolvimentu
nasaun nian".
Prezidente
fó hanoin ona katak besik hotu ona prezidénsia rotativu dahuluk Timor-Leste
nian hosi CPLP, marka progresu nasaun nian "hosi teritóriu okupadu no
rezistente, Estadu kredível no responsável, integradu iha komunidade hosi
nasaun sira, no hodi buka dalan sira ba esforsu seguransa sira nain no hosi
moris-di'ak ami nia povu nian".
SAPO
TL ho Lusa
Sem comentários:
Enviar um comentário