KONJUNTURA POLITIKA ATUAL PRESIZA LIDER ISTORIKU

DILI -  Militante FRETILIN, Rui Maria de Araújo, atual Primeiru Ministru hatete, lider istóriku sira nia papel sei importante nafatin iha konjuntura polítika  atual.

Rui subliña, hahú hosi tinan 2002 to’o tinan 2017 nu’udar faze krítiku ida iha tranzisaun hosi lideransa istóriku hosi tinan 1975 ba lideransa foun sira. Tanba ne’e, tuir nia, saida mak FRETILIN halo iha eleisaun direita ba pakote úniku ne’e normal.

“Entaun ita presija refleta didi’ak hodi fo importánsia  ba konjuntura polítika  ne’ebé mak agora ita iha hodi haré ba tinan 5 oin mai,” Rui subliña.

Papel lider istóriku sira nafatin iha dezenvolvimentu Timor Leste nian la’ós  de’it dezenvolvimentu polítiku, maibé iha mos dezenvolvimentu sósiu ekonómia.

Opsaun partidu istóriku FRETILIN nian, ne’e meius ida atu hili lider partidu nian liu hosi eleisaun direita, iha tinan 2011, agora tinan 2016 hosi pontu devista tradisaun demokratika, ne’e buat di’ak ida.

“Embora ita rona krítika hosi sosiedade tantu hosi ema iha partidu laran no ema hosi partidu liur, la iha kandidatu alternativa seluk, mas ne’e opsaun partidu FRETILIN nian, partidu hanoin katak iha konjuntura polítika  atual, lider istóriku, lider ne’ebé kontinua prosesu rejisténsia, ninia papel sei relevante nafatin iha konjuntura polítika  atual,” Rui hatete kestaun ne’e ba jornalista sira hafoin tuir eleisaun direta FRETILIN nian iha estasaun V Bedik, Suku Akadiriuhun, postu Admistrativu Nain Feto, Munisípiu  Dili, Sábadu, (03/09).

Nia dehan, haré ba lider istóriku sira ne’e sei iha, tanba ne’e mak orgaun sentrais partidu nian hanoin hodi aprejenta nafatin pakote ida ba militante sira eskolla.

Iha boletin  votus iha opsaun rua, mesmu pakote ida, maibé iha opsaun, se militante sira dehan lakohi atu eleitu lider nain rua hanesan Marí  Alkatiri ho Francisco Guterres Lu-Olo, ne’e mak partidu foin haré fali opsaun seluk.

“Ne’e mak dinámika  demokratika la’o  iha partidu nia laran, hanesan militante ha’u mos presija ezerse direitu votu iha partidu nia laran, tanba ne’e mak mai partisipa,” hatete atual PM ne’e.

FRETILIN Tenke Eziste Nafatin

Entretantu Kandidatu Prezidente FRETILIN, ba tinan 2017-2022, Francisco Guterres Lu-Olo hatete, bele haré ba situasaun no kondisões hotu maibé  importante mak FRETILIN tenke kontinua eziste iha Timor Leste.

Lu-Olo hatete, eleisau direita ne’ebé FRETILIN halo ne’e ba-dala rua ona tanba iha tinan kotuk mós halo ona ba pokote úniku  ne’ebé agora atu halo eleisaun, tanba ne’e adopta eleisaun direita ba lideransa partidu, klaru ke iha Timor Leste ema hotu bele konkorda pelumenus para bele hatete úniku  sistema eleisaun ba lideransa partidu, úniku  partidu FRETILIN mak bele halo ida ne’e, nune’e eleisaun direita ida ne’e liu hosi  mós prosesu demokrasia hosi  eleisaun ba kandidatu sira ne’ebé CNE iha tempu fó sai ba kandidatura sira atu bele konkorda, maibé  liu tiha prazu laiha ema ida tanba ne’e kontinua nafatin ho pakote úniku  ne’e.

“Desde ke militantes hotu hatan ami nain rua ne’e kontinua nafatin ba tinan lima, sim ami rua aseita nafatin atu asumi lideransa partidu FRETILIN ba oin, Desde Militantes sira hotu aseita atu ami rua nafati lidera partidu tanba ne’e ami pronto mais persiza haré mós ba ita nia kodisões no situasaun, maibé  ha’u  so bele hatete de’it FRETILIN tenke kontinua eziste duni iha Timor Leste,” Lu-Olo ba Jornalista sira hafoin tuir eleisaun iha Farol-Suku Motael, Postu Adminstrativu Cristu-Rei, Munisípiu  Dili, Sábadu  (03-09).(gus/rio)

Timor Post