Dom Virgílio do Carmo da Silva, SDB Inaugura Eskola São José Operário Balide

DILI - Bispo Diocese Dili, Dom Virgílio do Carmo da Silva, SDB, Sesta (18/11/2016), inaugura eskola foun São José Operário Balide. “Ohin, ita hamutuk iha ne’e atu inaugural eskola foun São José Operário Balide. Ida ne’e hanesan hatudu katak marka tan istoria foun ida, maske difikuldade oin-oin ne’ebé imi hasoru maibé la hamate ita boot sira nia inisiativa hodi buka nafatin oinsa mak atu mellora diak liu tan kualidade formasaun ba ita nia joven sira,” haktuir Amu Bispo iha Balide. Iha opurtunidade ne’e, Amu Bispo aviza ba estudante sira liuliu atu buka kolabora, fó aan ba estuda tanba atu sai diak iha futuru depende ba estudante nia badinas. 

“Kualidade estudante atu diak la depende ba uma nia diak no la depende ba professores sira maibé depende ba alunus sira ne’ebe mai buka matenek iha fatin ida ne’e. Ne’e duni aban bainrua imi atu susesu ka la susesu depende ba estudante sira, oinsa mak atu kolabora, fó aan ba estuda atu aprende fo an atu rona tanba imi nia futuru depende ba imi nia liman,” Amu Bispo fo hanoin.

Eskola São José Operário Balide, ne’ebé hetan ona inugurasaun husi Bispo Diocese Dili, eskola ne’e harii ho inisiativa husi Padre Mateus Afonso hamutuk ho nia professores sira. 

Padre Mateus Afonso hatete, papél importante uma kreda nian atu habelar doutrina, atu habelar edukasaun formasaun no umanizasaun ita ema nia liu husi edukasaun. “Motivu hau halo buat sira ne’e, tanba hau ema uma kreda nian dedika ba uma kreda la’os deit halo misaun hanesan ema hothotu hanoin maibe bele halo buat ruma, aproveitamentu ba dezenvolvimentu ita ema nian,” esplika Padre Mateus. 

Orsamentu ba harii eskola ne’e, Padre Mateus esplika, orsamentu ne’e mai husi alunus sira, maibé iha 2011 ho osan montante $.37.000.00, iha 2012 $.50.000.00, iha 2013 $.50.000.00, iha 2014 $.50.000.00, iha 2015 $.50.000.00 no iha 2016 to’o hetan inagurasaun iha $.50.000.00. (ljd)

Fontes: Jornál Diariu Timor-Post, 21 Novembru 2016, Loron Segunda-Feira