Eroi Loromatan Sei Lansa Aban

DILI, (TATOLI) – Ema barak dehan hakerek ne’e defisil. Defisil iha kombinasaun entre parágrafu no arma liafuan sira ho kreativu. Ba hakerek na’in ida ne’e, hakerek la’ós buat ida defisil maibé bainhira iha vontade no disiplina maka’as ita bele hakerek buat ida sai fásil.

La’ós oin foun maibé nia familiár ona ho komunidade jornalista iha Timor liuhusi ninia obra hakerek literatura iha mídia nasionál sira. Baibain, ninia belun jornalista sira bolu nia ‘Cassimata’ maibé ninia naran loos Câncio Ximenes Soares.

Hakna’ar án hanesan jornalista iha pasadu, nia konsege hahoris obra jurnalístiku lubuk iha inísiu independénsia. Ninia hakerek barak liu halai ba violasaun direitus umanus, amizade, domin, kultura no arrependimentu.

Obra hirak ne’e, balun fiksaun no balun non fiksaun. Cassimata iha disiplina arkiva ninia obra hirak ne’e hafoin publika sai iha mídia nasionál sira. Tanba sente obra ne’e importante, nia la arkiva ho konvensionalmente maibé nia transforma tiha ba livru ho pájina 234 hosi istória hamutuk 14.

Nia la toman hakerek ho modelu formál maibé hakerek ho literatura. Ko’alia kona-ba literatura, tuir nia, istória tuan ka istória foun, maske rai kle’ur ninia sabór dura kle’ur (tetap awet). La sin.

Tanba toman hakerek ho literatura, nia fó tópiku ba livru mós tuir dalen literatura tanba bainhira hakerek ho dalen literatura sei atrai ema atu lee. La seluk, livru ida ne’e nia prega ho títulu EROI LOROMATAN.

Tanbasá EROI LOROMATAN? Istória EROI LORON MATAN ne’e foti hosi títulu hosi istória ida entre istória 14. Katak, autór sira iha istória ne’e nia laran hanesan eroi luta ba ukun rasik án ne’ebé sira nia espíritu luta hanesan loromatan nia roman ne’ebé lakan hodi hadau ukun rasik án liuhusi torturasaun no sofrimentu ne’ebé sira enfrenta, inklui autór sira iha istória kona-ba domin, kultura, amizade. Sira hanesan eroi ba ita atu ita leno an.

Serteja, nia iha sentimentu kontenti ba ninia obra no ninia kreatividade iha hakerek tanba lori esforsu tomak durante tinan barak bele realiza obra boot refere nomós sai hanesan dezafiu ida ne’ebé sadik nia atu hakerek nafatin iha futuru be mai.

Hanesan aman ida, obra refere nia dedika epesiál ba ninia liurai feto, TALLA-“MATA” (Auxiliadora Savio Bernardina Berta Cassimata Ximenes) no ba ninia inan matebian Bernardina Ximenes. Tanba ho sira nia domin, sira nia pasiénsia, akompañamentu, suporta morál no orasaun, maka ninia mehi ne’e bele realiza.

Aban, 28 Dezembru 2018, tuku 09:30, loron espesiál ba Cassimata hodi lansa ninia livru iha salaun Eis Pós-CAVR, Balide, Dili. Livru kuaze 30 preparadu atu lansa iha loron aban no Sekretáriu Estadu Konsellu Ministru no Komunikasaun Sosiál, Matias Boavida maka lansa livru ne’e.

Hafoin lansamentu, Cassimata iha hanoin atu emprimi liu-tan hodi hodi koko lee-na’in sira nia reasaun iha merkadu. Parabéns Cassimata.

Jornalista: Xisto Freitas | Editora: Rita Almeida

Imajen: Livru Literatura