Família Lakohi Ema Kopia Múzika Lejendáriu Maulohi Nian

DILI, (TATOLI) – Reprezentante família enlutada artista lejendáriu, Francisco de J. Brites, Januario Brites fó atensaun katak ema se de’it mak kopia eh imita tuir saudozu Maulohi nia múzika sein autorizasaun, família sei keisa ba estadu atu prosesa tuir konstituisaun Repúblika Demokrátika Timor-Leste (RDTL).“Karik maluk balun uza ami-nia maun matebian Sikitu Maulohi nia múzika ba rendimentu ruma, laiha autorizasaun no koñesimentu husi família, sei hato’o ba estadu atu prosesa tuir lei ne’ebé vigora ona iha konstituisaun”, hatete Januario Brites, iha Palásiu Governu foin lalais ne’e.

Nia mós hodi família nia naran hato’o mensajen ba governu katak múzika sira ne’ebé saudozu rai hela nakonu ho istória; hahú dadur dahuluk iha 1975.

Nune’e mós, husu ba governu atu tau mós atensaun ba saudozu nia maluk sira ne’ebé uluk hetan torturasaun iha tempu okupasaun tanba sira mak loke uluk odmatan ba dadur sira seluk.

“Lori saudozu nia naran husik hela mensajen ba artista jerasaun foun sira katak tenke buka aprende barak husi lala’ok jerasaun artista tuan sira nian, kontinua haburas no hamorin Timor-Leste nia naran ba mundu hodi fó valór ba ita-nia identidade”, hato’o.

Entretantu, konstitusaun RDTL konsagra ona edukasaun no kultura iha artigu 59o no Propriedade Intelektuál iha artigu 60o.

Artigu 59o (Edukasaun no kultura); 1) Estadu rekoñese no garante sidadaun hotu nia direitu ba edukasaun no kultura, nune’e mós harii sistema ensinu báziku universál, obrigatóriu no wainhira bele,  saugati, tuir lei haruka. 2) Ema hotu iha direitu hanesan, ba oportunidade atu eskola no ba formasaun serbisu/profisaun nian.

Jornalista: Rafy Belo | Editora: Rita Almeida

Imagen: Artista lejendáriu Francisco de J. Brites, Siku Maulohi