segunda-feira, 8 de janeiro de 2018

AMP la rejistu iha TR ”Arão Noe: Kumpri regras legal


Aliansa Maioria Parlamentar (AMP) ne’ebe kompostu husi partidu CNRT, PLP ho KHUNTO seidauk rejistu iha Tribunal Rekursu (TR) tanba ne’e, jurista Timor oan, Manuel Tilman, konsidera AMP ne’e la’os legal maibe defaktu.

AMP mos la iha lista iha Comissão Nacinoal das Eleições (CNE) ho mos Secretariado Tecnico Administração Eleitoral (STAE).

“AMP sira atu halo buat ne´e tenke tuir lei partidus politikus, lei ne´e permite koligasoens ba buat hot-hotu, maibe tenke liu husi Tribunal  Rekursu, signifika katak partidu tolu (CNRT-PLP- KHUNTO) bele foti inisiativa ba buat ida ba sira nia aktividade ne´ebe sira halo dadauk ne´e, maibe antes atu halo tenke hatama lai rekerementu ida Ministeriu Justisa hodi rejista koligasaun, so ida ne´e maka permite ejistensia legal ba AMP hanesan koligasaun de partidus,” esplika Manuel Tilman,  ba GMN, foin lalais ne’e, iha Dili.

Advogadu privadu ne´e salienta, kuandu la rejistu iha Tribunal de Rekursu maka labele hala´o aktividade politika nein pre-eleisaun. Tanba ne´e, Manuel Tilman husu ba CNE atu fiskaliza aktividade AMP nian iha suku.

Hatan ba deklarasaun Manuel Tilman nian ne’e, membru PN husi Bankada CNRT Arão Noe de Jesus, klarifika katak, ejistensia AMP legal, tanba tuir Lei partidus politikus ho Konstituisaun Republika Demokratiku Timor-Leste (KRDTL).

“Hau hakarak dehan katak AMP ne’e legal, bazeia ba artigu 106 CRDTL, numeru 1 hateten katak, partidu mais votadu ou Aliansa Maioria Parlamentar ne’e katak ida mos manan maioria ne’e, bele mos ba ida Aliansa Maioria Parlamentar, iha lei Partiudu politikus 19 no mos 9 hateten kuandu halo koligasaun ruma tenke iha konferensia ruma atu aprova, tanba ne’e maka AMP halo ona konferensia, ne’ebe ho konferensia sira ne’e hodi retifika komprimisius sira ne’ebe AMP asina tiha ona, tanba ne’e AMP ne’e legal tuir Konstituisaun no tuir Lei partidus politikus,” hateten Arão Noe hodi responde  GMN bainhira partisipa seremonia Natal hamutuk PLP nian iha sede PLP, Metiaut, Dili, Sabado (06/01/2018).

Arão Noe dehan tan, Lei partidus politikus mos la obriga katak tenke rejistu iha Tribunal de Rekursu, maibe nudar dever moral partidu haruka ona karta ida ba Tribunal de Rekursu relasiona ho ejistensia AMP nian.

“Hau hakarak hateten katak, so koligasaun ida antes ne’e maka tenke rejista iha Tribunal de Rekursu, ida agora dadauk mos legal, tanba artigu 9 no 19 lei partidus politikus kumpri tiha ona,” hateten Arão Noe.

Nia mensiona mos katak, lei partidus politikus mos la obriga katak tenke rejista depois de eleisaun, mas hanesan dever moral AMP haruka ona karta ba Tribunal de Rekursu kona ba ejistensia Bloku AMP, tanba ne’e maka laiha regras legal ida AMP viola.

Deputado Opozisaun ne´e mos husu ba publiku katak, se senti AMP viola regra legal ruma bele hatama prosesu ba Trinunal. Mia

GMN TV | Grupo Média Nacional

Sem comentários: