Opozisaun Forte Governu Forte, PD Husu Apoiu VII Gov. Ba Oin

DILI – Situasaun politika neebe lao iha rai laran, opozisaun forte, PD konsidera opozisaun forte, governu forte, tanba nee husu atu apoiu VII governu lao ba oin. Maibe karik Prezidente Republika (PR) iha desizaun seluk PD prontu obedese.

Kestaun nee hatoo husi Deputadu Bankada PD Luis Mendes Ribeiro hatete, situasaun politika neebe lao agora dadaun nee mak too dia 22 Janeiru, nee Prezidente Republika nia dever mak atu foti desizaun ona, sira labele koalia tanba nee kompetensia PR nian. Maibe karik husu PD nia hanoin atu apoiu VII governu hodi lao ba oin.

Hanesan bankada kooligasaun husu para PR deside desizaun neebe diak, i PR mos hatene atu garante unidade nasional no dezenvolvimentu nasional, neebe prezidente sei halo buat hotu tuir konstituisaun. Maibe karik husu PD nia hanoin, husu para VII governu nee atu kontinua lao ba oin, i atu PR mos ho nia kompetensia atu husu ba politika sira hotu, orgaun sosiedade sivil, igreza para fo apoiu ba VII governu lao ba oin,” katak Luis ba Jornalista Segunda (08/01/2018) iha PN.

Nia hatete, governu agora lao nee, bainhira husi opozisaun kontrola forte ba programa governu nian nee governu sei servisu ho responsabilidade, servisu seriu ho kualidade atu bele ganha opozisaun nia komfiansa.

Iha fatin hanesan Xefe Bankada Khunto Luis Roberto da Silva hatete, husi Bankada Khunto nudar bankada opozisaun haree ba situasaun politika agora  lao dadaun desizaun hotu  fila fali ba siha Prezidente Republika atu foti, tanba PR mak nudar defeza ba iha konstituisaun. Desizaun saida mak PR fo sira prontu kumpri. 

Guilhermina Franco | Suara Timor Lorosae