La Halao Plenaria, AMP Konsidera Aniceto Kontra Rezimentu PN

THETIMOR-NEWS.com, DILI – Tuir orariu ne’ebe mak fo sai ona husi Prezidente Parlamentu Nasional (PN) Aniceto Guterres, iha Fulan kotuk antes  deputadu sira ba ferias nune’e, plenaria sei hahu fali 8 Janeiru 2018, maibe loron ne’e la akontese plenaria hanesan baibain bankada opozisaun ou AMP iha PN konsidera PPN kontra rezimentu Parlamentar.

Xefe bankada CNRT Arao Noe hatete, PPN Aniceto Kontra ona lei PN nian, tanba tuir lei, Segunda no Tersa PN tenke halo inkontru plenaria.

“PPN laos orgaun soberania ketak ida, nia ne’e reprezenta deputadu sira hotu, tanba ne’e mak iha artigu 17 rezimentu ne’e fo kompetensia ba nia atu organiza preside, maibe laiha kompetensia ida atu prezidente foti dezisaun tuir nia hakarak, buat hotu tenke liu husi reuniaun lider bankada hotu dezisaun ikus ne’e mak iha plenaria,” dehan Arao Noel ba Jornalista sira iha PN, Segunda (08/01/2018).

Iha fatin hanesan Xefe bankada PLP, Fidelis Magalhaes konsidera Prezidente Parlamentu lakoi atu konvoka inkontru planaria tanba tauk atu diskute no submete ba maioria, tanba durante ne’e sira nia parte hatama ona moasaun sensura ba governu tan deit governu lakoi lori fila programa, mai atu diskuti ba faze da-ruak.

“PPN Boikota plenaria ne’e tanba nia hakarak, dada buat ne’e hanesan buraixa, hodi lakoi atu debate mosaun sensura ne’ebe mak ami hatama fulan hirak liu ba kotuk, tanba lolos ne’e governu tenke haruka fila ona programa ba dala rua nian mai ona maibe to agora sei dauk haruka mai, sira sei dada  bebeik buat ne’e hanesan ne’e para to ikus fosala deit mai ami opozisaun mak la diak deit,” dehan Fidelis.

Hatan ba kestaun hirak ne’e, PPN Aniceto Guterres deklara,“Ohin 8 de Janeiru Parlamentu la halo plenaria tanba, hanesan baibain, plenaria iha kuandu iha agenda, tanba laiha agenda mak ohin ne’e plenaria, tanba tribunal ho governu seidauk iha dezisaun final ba rekursu ne’ebe mak hau hatama iha loron tolu uilan Janeiru ba proposta destituisaun no governu seidauk marka data hodi halo prezensa iha PN nune’e bele hare ba mosaun sensura ne’e.”

AMP hatama agenda rua ne’e ba PN iha tinan kotuk 2017 hanesan proposta destituisaun ba PPN Aniceto Guterres no Mosaun Sensura ba VII Governu konstitusional ne’ebe lidera husi Mari Alkatiri.

Hare ba ohin loron PN la halo plenaria hodi diskuti kona ba agenda rua ne’e, PPN Aniceto esplika, agenda kona ba proposta destituisaun PPN pendente hela maski Tribunal Distriral Dili (TDD) notifika ona laiha inkonstitusionalidade.

Tanba ne’e, 3 de  Janeiru 2018 nia parte hatama ona rekursu kona ba dezisaun ikus molok halo agendamentu ou diskusaun, ba agenda mosaun sensura, ne’ebe opozisaun hato hasoru governu hanesan PPN nia parte anunsia no notifika ona governu atu hatan iha loron 30 maibe loron servisu nian sura husi 18 Dezembru 2017 tinan kotuk, nune’e PPN haruka ona kart aba Primeiru Ministru Mari Alkatiri hodi hato nafatin kona ba anusiu ne’ebe hasai.

By: Hortencio Sanches | Editóra: Agida dos Santos

Imajen: Deputadu bankada CNRT Arao Noe. Photo: Google