DILI, (TATOLI) – Membru
Konsellu Konsultivu Fundu Petrolíferu (KKFP), Juvinal Diaz, hateten ekonomia
nasaun la’o hakdasak (sirkulasaun OJE ladún fó impaktu ba povu) la’ós tanba
laiha Orsamentu Jerál Estadu (OJE) maibé laiha prioritizasaun ba setór
dezenvolvimentu ekonómiku iha OJE.
“Ha’u la uza ezekusaun OJE
hanesan indikadór. Katak, ezekusaun bele atinje porsentu 100 maibé atu hatama
de’it importasaun no selu de’it projetu boot sira ne’ebé ninia retornu
ekonómiku ne’e la klaru, sei la fó rezultadu di’ak”, Juvinal ba Tatoli iha nia
kna’ar fatin KKFP, Parlamentu Nasionál, tersa ne’e relasiona ho implikasaun
impase polítika durante tinan rua ona ba dezenvolvimentu ekonomia rai laran.
Tuir nia kualidade despeza maka
sai indikadór, por-ezemplu, gasta orsamentu lubuk ba setór agrikultura hodi
intensifika produsaun lokál atu bele substitui importasaun ai-han, tanba ne’e
hanesan valór importante ida iha dezenvolvimentu ekonómiku.
“Ha’u nia pontu devista, OJE 2018
ne’e la’ós orsamentu ida ne’ebé atu bele hasa’e setór ekonómiku. Orsamentu 2018
ne’e atu funsiona de’it mákina Estadu, liu-lu selu saláriu, subsídiu no selu
dívida sira”, argumenta.
Juvinal afirma indikadór ba
dezenvolvimentu ekonómiku katak povu hetan benefísiu ida sustentável hosi
implementasaun programa, liu-liu kria kampu traballu ba tempu naruk ka hamosu
indústria.
“Klaru katak durante tinan rua
ikus ne’e ita infenta krize uitoan de’it, tanba orsamentu jerál Estadu la
sírkula durante fulan sia iha tinan kotuk, maibé hafoin ida ne’e la’o normál
hikas”, haktuir.
Jornalista: Xisto Freitas | Editora:
Rita Almeida
Imajen: Membru KKFP, Juvinal Diaz
Sem comentários:
Enviar um comentário