DILI, (TATOLI) - Diretór
Jerál Ospitál Nasionál Guido Valadares (ONGV), Aniceto Cardoso Barreto, relata
iha 2018, pasiente sira ne’ebé mak tama ospitál hodi halo tratamentu hamutuk
21.931, hosi númeru ne’e, porsentu 95.9 hetan ona
salvasaun, porsentu 3.8 la konsege salva tanba destinu.
“Iha tinan 2018, pasiente hamutuk
21.931, iha porsentu 95.9 mak hetan salvasaun ka fila ho kondisaun di’ak,
nune’e porsentu 3.8 mak la konsege salva tanba ho destinu. Ida ne’e hatudu
katak prestasaun servisu nia atinjimentu mak ida ne’e,” Aniceto Cardoso ba
jornalista sira liuhosi konferénsia imprensa iha sala konferénsia, Ospitál
Nasionál, ohin.
Nia reforsa pasiente sira ne’ebé
hetan salvasaun la sura ho sira ne’ebé halo tratamentu iha emerjénsia, nune’e
mós pasiente sira ne’ebé mai hosi klínika nian.
Iha parte seluk ONGV nia pesoál
saúde sira servisu durante oras 24 nia laran, hodi fó atendimentu ba moras oioin
ne’ebé tama iha ospitál.
Ospitál mós iha médiku
espesialista timoroan hamutuk 30, iha área hothotu, hanesan medisina interna,
korasaun, pulmaun, pediatria no seluk tan.
“Kuaze kompletu maibé seidauk
sura sira ne’ebé mai hosi Brigada Kuba, Xina, Australia, Nepal no seluk tan,”
Nia reforsa.
Doutór espesialista hirak ne’ebé
servisu iha ONGV, domina aparellu sira iha radiolojia, laboratóriu no seluk
tan.
“Ami fiar nafatin katak ospitál
oferese servisu ho profisionalizmu hodi atende ba pasiente sira.”
Entretantu, aparellu hirak ne’ebé
iha agora, ida ne’e sufisiente, tantu mákina fase ran, ICU, Radiolojia no
laboratóriu kompara ho tinan lima liu ba. Laboratóriu mós sempre iha
kalibrasaun kada fulan neen ka kada tinan, ne’ebé kualidade aseguradu.
Jornalista: Zezito Silva | Editór:
Manuel Pinto
Sem comentários:
Enviar um comentário