BANDU NEGOSIANTES FAAN SASAN IHA DALAN PROTOKOLU

Governu liu husi Ministerio Comercio Industria e Ambiente (MCIA) servisu hamutuk ho Ministerio relevante deside ona atu dalan protokolu iha Dili laran la permite tan ba negosiante sira faan sasan arbiru hanesan faan kareta ho motor no faan sasan sira seluk tan.

Governu bandu negosiantes sira labele fan tan sasan iha fatin sira refere tanba la apropriado para halo atividade negosiu.

“Agora ba oin la’os MCIA ninia kna’ar para loro- loron ba tenke kontrola emprezarius sira ne’e servisu latuir nia Disiplina faan sasan arbiru deit hanesan faan iha Largo Lesidere ho hali okos Casa Europa nia oin,”hateten Diretor Jeral Komersiu, Cosme Fatima Baptista da Silva, ba Jornal Nacional Diário, Sesta (03/ 07/2015), iha Fomento Mandarin, Dili.

Cosme Fatima Baptista da Silva hateten mos katak, knaar ida ne’e entrega ona ba polisia Nasional Timor–Leste ho Ministeriu Administrasaun Estalal no Munisipiu Dili atu bele haree hamutuk.

“Sira mak ukun povu fo atensaun ba komunidade sira iha Postu, Munisípiu sira ne’ebe tuir lolos sira mak tenke kontrola atividades sira ne’e para atividade sira ne’e labele hala’o tan iha fatin publiku, tenke mantein saudavel nomos tenke moris iha orden nia laran no moris iha siguransa estabilidade nia laran, ne’e la’os kna’ar MCIA nian deit maibe hot-hotu tanba politika kona ba ne’e diside tiha ona,”dehan nia.

Banhira Jornal Nacional Diário koko atu konfirma asuntu ne’e Administrador Munisípiu Distrital Dili maibe nia laiha tempu.

Iha Parte seluk vendadores   faan motor, Armindo Fernandes ba JNDiário iha Hali okos casa Eurupa nia oin hateten, durante ne’e sira faan iha fatin ne’e sira selu tasa, maibe seidauk iha informasaun klaru klaru ba sira atu muda ba iha fantin ida ne’ebé.

“Ami seidauk simu informasaun foin ita bo’ot sira media mai halo entrevista ho ami mak foin ami rona dehan fatin ida ne’e keta faan motor ho kareta,”dehan nia.

Nia afirma tan katak, vendadores sira ne’ebe faan motor kareta iha fatin refere polisia sira seidauk fo avizu ba sira.

“Ami faan motor ho kareta iha ne’e durante ne’e polisia sira seidauk duni ami tanba ami faan iha fatin ne ami lahalo problema. Ami mai faan iha ne’e atu buka moris hodi hetan osan bele sustenta familia uma laran, I ami faan iha ne’e mos fula- fulan selu tasa ba Alfandenga tamba ami ajuda nasaun tenke selu tasa ba Estado,”dehan Armindo.

Armindo deklara tan, tasa ne’ebe fulan-fulan selu ba Alfandenga ne’e, depende ba kada motor ida tuir nia tarifa hanesan motor bebek sira ne’e tuir sistema iha neba hanesan keluaran 2015 selu $21 no keluaran 2013 , 2014 selu $ 60,”dehan Armindo.car

Jornal Nacional