MF PROMETE REZOLVE PROBLEMA SETOR PRIVADU

DILI - Minsitra Finansas Santina Cardozo hatete Ministeriu Finansan (MF) sei hamutuk ho Camara Comersiu Industria Timor-Leste (CCI-TL) hodi rezolve problema setor privadu liu-liu pagamentu ba projetu ne’ebé ohin loron tarde tebes. Ministra Finansas hateten ida ne’e hafoin halo enkontru ho Prezidente CCI-TL Oscar Lima ho nia estrutura sira iha Ministeriu   Finansas durante oras rua nia laran foin lalais ne’e.

Nia dehan enkontru CCI-TL ho Ministeriu Finansas oinsa atu halo diskusaun no tau hamutuk ideia hodi bele rezolve problema ne’ebé durante ne’e sai preokupasaun setor privadu nian liu-liu kona ba problema pagamentu ba iha projetu sira. “Hau esplika uitoan kona-ba sistema pagamentu no hau mos husu ba sira, se sira iha kontratu ho governu no seidauk prosesu pagamentu bele fo lista ne’e mai iha Ministeriu Finansas, depois ami kolia ho entidade relevante oinsa bele rezolve sira nia problema ba pagamentu hirak ne’e,” dehan Ministra Financas Santina Cardozo ba Jornalista sira iha nia knar fatin, kuarta (01/07) foin lalais ne’e.

Nia dehan kona-ba projetu emerjensia sira ne’ebé uluk seidauk selu no Ministeriu Finansas seidauk simu lista tanba sei iha hela prosesu verifikasaun ne’ebé oras ne’e daudaun Ajensia Dezenvolvimentu Nasional (ADN) halo hela verifikasaun iha teritoria laran tomak. “Kona ba lista projetu sira ne’ebé mak sidauk selu Ministeriu Finansas sidauk simu lista tanba sira rasik seidauk fo lista tanba ohin sira dehan ohin sira sei ba tur hamutuk hodi halo lista haruka mai iha Ministeriu Finansas hodi ami tur hodi hare fila fali no verifika projetu ne’e husi ne’ebé hodi bele rezolve problema ne’ebé mak iha,” dehantan Ministra Finansas ne’e.

Maibe nia dehan projetu ne’ebé mak la liu husi aprovisionamentu no laiha  kontratu governu sei la  halo pagamentu tanba bainhira implementa projetu ida sempee iha kategoria hanesan BoQ, dezenho kontraktu no se wainhira laiha kontaktu laiha pagamentu tanba lei la fo dalan atu halo pagamentu se la iha  kontratu. “Ita hatene katak wainhira iha projetu tenke iha instrusaun ruma husi governu hodi halo projektu maibe tenke iha kontraktu ruma atu bele kesi parte rua, se laiha kontraktu Ministeriu Finansas labele selu,”dehan nia.

Entretantu Prezidente CCI-TL, Oscar Lima orgulhu ho aundensia refere tanba konsege hetan informasaun diak husi ministra Finansas Santina Cardozo katak sira pronto hamutuk ho CCI-TL hodi resolve problema ne’ebé setor privadu hasoru ohin loron. “Hau hanoin ami marka audensia ida ho Ministra Finanasas rezultadu ne’ebé mak ami buka hodi solisiona ho problema ne’ebé mak ita hare pendenti hela durante tinan hira nia laran no uluk ami tenke ho eis ministra sidauk konsege rezolve mos, ohin ami sente kontenti teb-tebes Ministra Finansas agora tenta buka halo nusa solusiona problemas, ami sente kontenti teb-tebes tanba nia promote katak sei hamutuk ho CCI-TL hodi haree ba problema ne’ebé mak iha,”dehan Oscar Lima hafoin  remata enkontru refere.

Nia dehan durante ne’e projetu governu nian barak ne’ebé mak setor privadu implementa sidauk  seidauk hetan pagamentu tanba ne’e difikulta tebes atividade setor privadu sira. Prezidente CCI-TL ne’e hateten CCI-TL  sei fo mos  orientasaun ba iha prezidente CCI Munisipiu 13 atu halo levantamentu ba iha projetu sira ne’ebé mak durante ne’e sidauk halo pagamentu hodi aprezenta ba iha Ministeriu Finansas hodi buka solusaun. Tuir nia katak projetu pagamentu ne’ebé mak durante ne’e sei pendent hela mak projektu emergensia.

“Kazu ne’ebé mak pendente teb-tebes ne’ebé ami kolia beibeik, ami sei halo fila fali levantamentu de dadus ba iha projetu ne’ebé mak sidauk selu hodi aprezenta ba iha Ministra Finansas hodi buka oinsa mak iha solusaun, laos deit projetu emergensia maibe iha pagamentu balun ne’ebé mak kleur demais,” dehan Oscar. Wainhira jornalista husu kona-ba  projektu balun ne’ebé laiha kontratu governu sei la selu Oscar Lima hateten ne’e tanba failansu tekniku. “Failansu ne’ebé iha hodi buka oinsa bele iha solusaun tanba ne’e tenke halo fila fali projetu hanesan projetu emergensia karik iha levantamentu de dadus iha duni projetu halao duni no ita husu tuir se mak fo karik eis sekretariu estadu mak fo tenke buka oinsa bele solisiona problema ida ne’e,” dehan nian. (BT)

Business Timor - Pedro